Dy tituj kampioni në tri vite. Festa ka nisur sërish në Napoli, pas një kampionati mjaft negativ si ai i sezonit të kaluar. Në këtë sezon, skuadra napolitane ka ditur t’i bëjë ballë Interit, duke ia rrëmbyer titullin pas një dueli shumë tërheqës.
Merita i shkon Antonio Contes, udhëheqësit të të kaltërve, i zgjedhur nga presidenti Aurelio De Laurentiis për ta rikthyer Napolin te triumfi në Itali. Dhe zgjedhja rezultoi absolutisht e drejtë me suksesin kundër Cagliarit, të premten mbrëma, që i dhuroi qytetit titullin e katërt të kampionit të Italisë.
Conte në dyshim?
Tani çështja që mbizotëron është ajo që lidhet me trajnerin Antonio Conte. Pozicioni i tij për momentin mbetet ende i pasigurt. “Do t’i lutem të qëndrojë, por nuk mund ta detyroj”, – tha presidenti pas fitores 2-0 ndaj Cagliarit. Marrëdhënia mes tyre me sa duket është krisur pas vendimeve të janarit, që çuan në shitjen e Kvaratskhelias te PSG.
Merkatoja dhe projektet
Tani, megjithatë kushtet mund të ndryshojnë. Siç raporton edicioni i sotëm i “Corriere dello Sport”, numri një i Napolit është i gatshëm të investojë 200 milionë euro në merkato për ta bindur trajnerin e tij të qëndrojë në pankinë. Edhe pak ditë dhe, ndoshta, do të vijë përgjigjja përfundimtare.
