Detaje të reja janë zbuluar nga aksioni policor në kryeqytet paraditen e sotme. Policia njofton se 42-vjeçari Enis Vrapi, pasi qëlloi me pistoletë lodër një mjeke në QSUT, tentoi të arratisej me një automjet tip Land Rover duke përplasur 3 makina të policisë ku dëmtoi lehtë 2 punonjës policie të qarkullimit rrugor.
42-vjeçari Enis Vrapi, i cili dyshohet se vuan nga probleme të shëndetit mendor, është shoqëruar në ambientet e Policisë, me qëllim kryerjen e veprimeve të mëtejshme procedurale.
“Rreth orës 09:00, shtetasi E. V., 42 vjeç, dyshohet me probleme të shëndetit mendor, ka qëlluar me pistoletë lodër (me gogla), në drejtim të gjymtyrëve të poshtme, një mjeke të Qendrës Spitalore Universitare “Nënë Tereza”, dhe ka tentuar të largohet me automjet nga ambientet e kësaj qendre.
Menjëherë pas marrjes dijeni, shërbimet e Policisë i janë vënë në ndjekje këtij shtetasi, kanë mundur ta kapin dhe kanë kryer shoqërimin e tij, në ambientet e Policisë, me qëllim kryerjen e veprimeve të mëtejshme procedurale.
Gjatë tentativës për t’u larguar, 42-vjeçari ka përplasur me automjetin që drejtonte, 3 automjete policie. Nga përplasjet u dëmtuan lehtë 2 punonjës policie të qarkullimit rrugor.”- njofton policia.
Grupi hetimor, në drejtimin e Prokurorisë së Tiranës, vijon punën për dokumentimin e rrethanave të rastit.
