Është zbardhur identiteti i shqiptar, i cili u ekzekutua këtë të enjte me armë zjarri në zonën bregdetare të Rafinës në Athinë të Greqisë.
Mediat fqinje raportojnë se viktima është shtetasi Altin Arapaj, 41 vjeç, person me precedentë penal në Greqi, për vepra të ndryshme penale, si dhe i përfshirë edhe në trafik droge.
Altin Arapaj është vrarë brenda një vreshti, ku plumbi e ka goditur në faqe. Pasi ishte qëlluar me armë zjarri, shqiptari kishte telefonuar bashkëshorten e tij 36-vjeçares, të cilës i kishte thënë vetëm se ishte qëlluar nga një miku i tij, duke i thënë emrin.
36-vjeçarja e kërkoi atë përmes aplikacionit “Find my iPhone”, nga ku gjeti pas disa orësh vendndodhjen e celularit të tij. Së bashku me një ekip nga njësia DIAS e Policisë Helenike, ata shkuan në kryqëzimin e rrugëve Arionos dhe Anemoessas, në zonën e Artemidës, ku telefoni i viktimës u gjet i mbuluar me gjak, por shqiptari nuk u gjet. Më pas kërkimet u zgjeruan në atë zonë ku u gjet edhe 41-vjeçari shqiptar i vrarë.
Mësohet se autori i dyshuar i krimit është gjithashtu me origjinë shqiptare dhe i njohur për autoritetet greke për përfshirje në raste të trafikut të drogës.
Policia ka nisur hetimet për zbardhjen dhe dokumentimin e plotë të ngjarjes, me qëllim kapjen e autorit të vrasjes.
