Dy trena u përplasën të dielën në mbrëmje në Sllovakinë perëndimore, duke shkaktuar dhjetëra të plagosur, sipas qeverisë sllovake.
Rreth 800 pasagjerë ndodheshin në të dy trenat, që udhëtonin midis Svätì Jur dhe Pezinok, rreth 20 kilometra në veri të kryeqytetit Bratislava, në kohën e përplasjes, thanë autoritetet.
“Dhjetëra prej tyre pësuan lëndime të lehta”, tha Ministri i Brendshëm sllovak Matús Sutaj Estok në vendin e aksidentit. Njëmbëdhjetë persona u dërguan në spitalin e Bratislavës, shtoi ai, duke specifikuar se nuk kishte viktima.
“Oficerët e policisë në vendngjarje po ofrojnë ndihmë për shërbimet e emergjencës,” tha Policia Rajonale e Bratislavës në Facebook, duke e përshkruar skenën si “kaos”.
Aksidenti hekurudhor përfshinte trenin ekspres Tatran nga Kosice në Bratislavë dhe një tren ekspres rajonal nga Nitra në kryeqytet.
Një hetim është duke u zhvilluar për të përcaktuar shkakun e aksidentit. “Treni kaloi me të kuqe dhe u largua nga stacioni kur nuk duhej.
Treni i dytë ekspres u përplas me të me mbi 100 km/orë”, tha Ivan Bednárik, drejtor i Hekurudhave sllovake. “Të dy shoferët dolën negativë në testet për alkool dhe drogë”, tha një zëdhënës i policisë.
