Gazetari Sokol Bregu ka folur rreth aksionit “Ura”, i ekzekutuar nga autoritetet italiane në bashkëpunim me SPAK, ku u godit një grup kriminal i trafikut ndërkombëtar të lëndëve narkotike me bazën kryesore në Durrës.
Bregu tha në MCN se me këtë aksion u godit baza më e madhe narkotrafikut në Shqipëri, teksa sipas tij, Elvis Doçi, nipi i Xhevdet Troplinit, i njohur si “Poja”, konsiderohej si një nga njerëzit më të paprekshëm.
“Iu dha një goditje e fundit dhe më e forta bazave të narkotrafikut në Durrës. Kjo ka qenë baza më e madhe e narkotrafikut në Shqipëri me këtë goditje, i jepet një knock out, ose afër knock out-it për trafikun galopant të drogës që zhvillohet në Shqipëri. Jo ajo që zhvillohet në BE. Lidhja në këtë rast ka qenë me Barin, vetëm këtë mund të kenë hulumtuar prokurorët e antimafias italiane. Pjesa më e madhe i takon atyre.
Emri kryesor, mbetet baza e atij që është përfolur dhe gjatë fushatës, flitet për nipin e tij, Ervis Doçin, siç është folur është konsideruar si një nga njerëzit më të paprekshëm. Tani ka një masë arresti me burg në fuqi ndaj tij. Dumani ka qenë i rezervuar. Ka bërë të ditur që janë dy policë, njëri prej tyre në rang të lartë. Policët janë të arrestuar dhe avokati. Me historinë ka të bëjë vetëm skema e sjelljes së parave, duke përdorur mjetet e transporteve të udhëtareve. Aty fshiheshin. Shqipëria vijon të mbetet problem më vete sa i përket transportit të parave, në Europë transportohen me mënyrën kineze.”
Sipas Sokol Bregut ajo që ndodhi mbrëmjen e djeshme në Durrës me bombën me telekomandë të gjetur pranë Velieres, ishte për të tërhequr vëmendjen e Policisë.
“Unë mendoj që ajo që ndodhi dje në Durrës me bombën ishte kamuflim për t’i dhënë kohë për t’u larguar. Ishte kamuflim për tërheqjen e vëmendjes e policisë në Durrës.”
