Për herë të parë në zgjedhjet parlamentare të 11 Majit, votoi me postë edhe diaspora shqiptare, një proces i cili po kontestohet shumë nga opozita, e cila pretendon për manipulime.
Vota e diasporës shkoi në favor të Partisë Socialiste, e cila fitoi me rezultat edhe më të thellë se nga votat brenda vendit. Sipas shifrave, në çdo tre emigrantë, dy votuan për Partinë Socialiste, duke thelluar edhe më tej rezultatin
Por në cilat Qarqe pati ndikim vota e diasporës dhe për çfarë?
Së parti, vota e diasporës i dha një mandat më shumë Partisë Socialiste në Qarkun e Vlorës, duke e çuar në 9 mandate në total për këtë qark, dhe duke i hequr kështu një mandat nga lista e mbyllur demokratëve. Në këtë rast përfitoi Vasil Llajo, i cili mori mandatin e deputetit, se me 8 mandate të socialistëve, ai do të ngelej jashtë Kuvendit, duke u penalizuar edhe nga kuotat gjinore.
Vota e diasporës pati ndikim edhe sa i përket deputetit të demokratëve në Kukës nga lista e hapur. Me votat brenda vendit fitues ishte Shkëlqim Shehu, i cili kishte 433 vota më shumë se sa Isuf Çelaj.
Por, rezultati u përmbys nga votat e diasporës, duke bërë që Isuf Çelaj të vazhdojë të jetë ende deputet, pasi fitoi vetëm me 60 vota më shumë se sa Shkëlqim Shehu. Ky i fundit pretendon se i kanë tjetërsuar votat brenda demokratëve dhe ka kërkuar pamjet filmike të numërimit nga KQZ.
Po ashtu, votat e diasporës patën ndikim edhe tek deputeti nga lista e hapur e Partisë Socialiste në Qarkun e Lezhës. Me votat brenda vendit, Marjeta Neli ishte 1145 vota më shumë se sa kandidati Admir Kadeli. Por, rezultati u përmbys nga votat e diasporës, ku Admir Kadeli kaloi me 27 vota para kandidates Neli, duke bërë që ai të marrë mandatin e deputetit dhe të futet për herë të parë në Kuvend.
Ndikim pati edhe sa i përket listës së socialistëve në Tiranë, sa i përket përplasjes mes Blerina Gjylametit dhe Olta Xhaçkës. Me votat brenda vendit mandati i takonte Blerina Gjylametit me 19 vota më shumë se ish-ministrja Olta Xhaçka. Por, edhe në këtë rast rezultati u përmbys nga diaspora dhe mandatin e deputetit e mori Olta Xhaçka, pasi kaloi në avantazh me një diferencë prej 140 votash nga Gjylameti. Kjo e fundit fillimisht pretendoi se i kishin tjetërsuar votat dhe bëri kërkesë në KQZ për pamjet filmike, por pas urdhrit të Edi Ramës u tërhoq.
Pra, siç shihet përmbysjet kanë ardhur me një diferencë shumë të vogël votash, ku nuk përjashtohen edhe tjetërsimet e votave brenda llojit, por tek socialistët ankesat u ankuan dhe nuk do të merret vesh nëse ka patur apo jo vjedhje brenda llojit.
