Tre punonjës të policisë dhe një doganier janë arrestuar nga Agjencia e Mbikëqyrjes Policore (AMP) në Pikën Kufitare “Hani i Hotit”, në Shkodër.
AMP bën me dije se tre punonjësit e policisë, Lekë Çekrezi, Fatjon Hamzi dhe Tonin Melaj dhe doganieri Selami Ethemi, akuzohen për veprën penale “Shpërdorim i detyrës”.
Hetimet lidhen me një ngjarje të datës 17 shtator 2023, kur një kamion shqiptar, pas kalimit në mënyrë të paligjshme nga pika kufitare shqiptare, u ndalua nga autoritetet malazeze në pikën kufitare “Bozaj”, ku u zbuluan mbi 442 kg lëndë narkotike e dyshuar “Cannabis Sativa”.
Njoftimi i AMP:
Në vijim të hetimeve disa mujore mbi procedimin penal të vitit 2023, Agjencia e Mbikëqyrjes Policore (Rajoni Shkodër – Lezhë) në bashkëpunim me Drejtorinë e Hetimit Doganor dhe Prokurorinë Pranë Gjykatës së Shkallës së Parë të Juridiksionit të Përgjithshëm Shkodër, ka ekzekutuar urdhërat e ndalimit për tre punonjës policie dhe një doganier, të dyshuar për kryerjen e veprës penale “Shpërdorim i detyrës”.
➡️ L. Ç., punonjës policie në Pikën Kufitare “Hani i Hotit”.
➡️ F. H., punonjës policie në Pikën Kufitare “Hani i Hotit”.
➡️ T. M., punonjës policie në Pikën Kufitare “Hani i Hotit”.
➡️ S. E., me detyrë Doganier në Pikën Kufitare “Hani i Hotit”.
Urdhërat e ndalimit vijnë pas hetimeve të thelluara me metoda speciale në lidhje me ngjarjen e datës 17/09/2023, ku një kamion me targa shqiptare, pasi ka kryer procedurat e daljes nga Republika e Shqipërisë nëpërmjet Pikës Kufitare “Hani i Hotit”, në kundërshtim me ligjin dhe procedurat standarde, është ndaluar nga policia e Pikës së Kalimit Kufitar “Bozaj”, Mali i Zi, pasi në kamion është gjetur një sasi prej 442.084 kg lëndë narkotike e dyshuar “Canabis Sativa”.
