Kuvendi i Shqipërisë ka miratuar me 100 vota pro ndryshimet në Rregulloren e Kuvendit në mbyllje të seancës së kësaj të enjteje.
Ndryshimet u votuan me konsensus mes Partisë Socialiste dhe Partisë Demokratike. Mes dakordësive kryesore është vendimi që seancat plenare të mos zgjasin më pas orës 22:00. Në rast se debati nuk përfundon, seanca do të ndërpritet dhe do të vijojë ditën tjetër.
PS hoqi dorë nga disa propozime të mëparshme, mes tyre shqyrtimi i përshpejtuar i projektligjeve të lidhura me BE-në dhe përgjysmimi i kohës së diskutimeve për deputetët.
Palët ranë dakord edhe për forcimin e kontrollit parlamentar, duke detyruar institucionet t’u përgjigjen kërkesave të deputetëve për informacion dhe komisionet parlamentare të zhvillojnë mbledhje ose seanca dëgjimore kur kërkohet nga opozita.
Po ashtu, sipas rregullores së re, në sallën e seancës plenare do të raportojnë vetëm disa institucione kushtetuese dhe të pavarura.
Sipas draftit, Prokurori i Përgjithshëm do të raportojë në seancë plenare për gjendjen e kriminalitetit në vend, ndërsa drejtuesi i SPAK do të raportojë vetëm në komisione parlamentare, mes tyre edhe ai i drejtuar nga Fatmir Xhafaj.
Kliko këtu për të lexuar draftin e plotë.
