Banka Qendrore Europiane shpreson të ketë të gjitha vendimet politike në fuqi deri në fillim të vitit të ardhshëm për krijimin e euros digjitale. Më pas do të duhen dy deri në tre vjet për të lançuar monedhën, tha një anëtar i bordit të BQE-së.
BQE ka punuar për një version digjital të monedhës evropiane për vite me radhë, por progresi ka qenë më i ngadaltë se sa pritej, kryesisht sepse legjislacioni ende nuk e lejon bankën të vazhdojë me procedurat.
Trazirat financiare pas zgjedhjes së Donald Trump si President i SHBA-së kanë shtuar ndjenjën e urgjencës, pasi Europa mbështetet në firmat e mëdha amerikane për shumicën e pagesave digjitale dhe kjo paraqet një dobësi të mundshme financiare.
“Shpresoj të kemi gjithçka gati deri në fillim të vitit të ardhshëm. Ne kemi nevojë për legjislacionin e duhur, dhe nga kjo, dy deri në tre vjet do të jenë të mjaftueshën për të lançuar euron dixhitale,” thanë burime brenda Bankës Qendrore.
Ndryshe nga pagesa me karta si Visa apo Mastercard, konsumatorët që paguajnë me para digjitale do të kenë lidhje të drejtpërdrejtë me bankën qendrore, ndërsa fondet e tyre do të jenë të sigurta e të ngjashme në funksion me paratë “cash”. Kjo do t’u lejonte klientëve të bënin pagesa të drejtpërdrejta si në formatet online ashtu edhe fizikisht.
Banka tha se një pengesë kryesore është arritja e një marrëveshjeje politike nga shtetet anëtare të BE-së, por kjo mund të realizohet para verës. Puna e Parlamentit Evropian mund të zgjasë disi më shumë, shtuan burimet.
Kur u pyetën nëse Trump mund ta përshpejtonte procesin, zyrtarët e bankës qendrore franceze, thanë se kjo ka shtuar vendosmërinë e BQE-së për të vazhduar me projektin.
