Nisja e numërimit të votave të diasporës ka ekspozuar manipulimin total të procesit nga ana e Partisë Socialiste. Që në kutitë e para u konfirmuan dyshimet e opozitës se procesi në Greqi kishte dalë jashtë kontrollit dhe kutitë ishin mbushur nga patronazhistët e Partisë Socialiste. Në pjesën dërrmuese të procesverbaleve, pavarësisht qarqeve, vihet re një raport votash 1 me 10 në favor të Partisë Socialiste, çka dëshmon përmasat e frikshme të manipulimit të votës së diasporës shqiptare në Greqi.
Procesi i numërimit të votave të diasporës shqiptare në Greqi ka zbuluar hapur manipulimin total të votave të emigrantëve nga ana e Partisë Socialiste. Që në kutitë e para u konfirmuan dyshimet e opozitës se procesi në Greqi kishte dalë jashtë kontrollit dhe kutitë ishin mbushur nga patronazhistët e kësaj partie.
Procesverbali që po shihni i përket Qarkut të Korçës. Manipulimi i vullnetit të qytetarëve është i përmasave të frikshme. Nëse në Shqipëri, Partia Demokratike në këtë qark, pavarësisht manipulimeve, ka marrë 34.57% të votave, ky raport në Greqi është totalisht i deformuar. Në këtë kuti, Partia Demokratike ka marrë 32 vota, ndërsa Partia Socialiste 266 vota një raport pothuajse 9 me 1 në favor të socialistëve.
Ky procesverbal i përket Qarkut të Fierit. Në votimin brenda vendit, Partia Demokratike mori në këtë qark 25.45% të votave, por situata ndryshon krejtësisht te votat e diasporës në Greqi. Siç shihet, PD rezulton me vetëm 21 vota kundrejt 324 votave të Partisë Socialiste një raport i pabesueshëm votash, 1 me 12.
Edhe në një tjetër procesverbal të Qarkut Fier, përmasat e manipulimit janë të frikshme. Partia Demokratike rezulton me 33 vota, ndërsa Partia Socialiste me 269 vota.
Situata me manipulimin e votave të diasporës shqiptare në Greqi nga Partia Socialiste është e njëjtë edhe në qarqet e tjera. Ky procesverbal i përket Qarkut të Tiranës, ku në votimin brenda vendit PD mori 34.89% të votave. Siç shihet, situata përmbyset tërësisht – PD rezulton me 42 vota, ndërsa Partia Socialiste me 233 vota. Një situatë pothuajse identike paraqitet edhe në një tjetër procesverbal të Tiranës, ku PD rezulton me 43 vota dhe Partia Socialiste me 250 vota – një raport votash pothuajse 1 me 8 në favor të socialistëve.
Prova e qartë e manipulimit është shuma e votave të diasporës për Qarkun e Tiranës. Sipas të dhënave të Komisionit Qendror të Zgjedhjeve, janë numëruar 43,435 zarfe, kundrejt 42,402 zarfeve në total pra janë numëruar më shumë vota se sa ka pasur në kuti.
Situatë e ngjashme paraqitet edhe në Qarkun e Beratit. Siç shihet nga procesverbali, PD rezulton me 28 vota kundrejt 371 votave për Partinë Socialiste – një raport rreth 1 me 14 në favor të socialistëve, ndërkohë që në votimin brenda vendit, PD mori mbi 30% të votave në këtë qark. Një situatë e njëjtë paraqitet në të gjitha qarqet e vendit, çka dëshmon për një manipulim në shifra dramatike të votës së shqiptarëve në Greqi.
Gjatë numërimit dolën prova të reja që dëshmojnë se votat nuk janë plotësuar nga zgjedhësit, por në shumë raste nga një dorë e vetme, e cila ka vënë kryqin te numri 5 i Partisë Socialiste.
Shkatërrimit të procesit dhe vjedhjes masive të votave i hapi rrugën vetë kryeministri Edi Rama, i cili një javë para zgjedhjeve, gjatë një fjalimi në Gjirokastër, dha sinjalin për aktivizimin e këtij mekanizmi.
Menjëherë pas kësaj deklarate, Taulant Balla dhe grupet e patronazhimit u nisën drejt Greqisë dhe, në mënyrë të pabesueshme, nga rreth 1,000 zarfe në ditë që vinin më parë nga Greqia, nga data 5 deri më 11 maj, filluan të depozitoheshin mbi 6,000 zarfe në ditë. Këto zarfe nuk reflektojnë vullnetin e qytetarëve shqiptarë në Greqi, por janë vota të manipuluara nga patronazhistët e Partisë Socialiste, çka rrëzon tërësisht procesin zgjedhor të 11 majit./ Syri
