Policia kufitare e Rinasit ka arrestuar një person, i cili tentoi të hynte në Shqipëri me identitet fals, pasi rezultonte i dënuar në Itali.
Në pranga është vënë shtetasi Eduart Isaku, 40 vjeç, i cili rezulton i dënuar me 5 vjet burgim, për pjesëmarrje në organizatë kriminale, për vjedhje me dhunë.
“Shërbimet e Policisë Kufitare të Rinasit kanë konstatuar në hyrje të Shqipërisë, se shtetasi Eduart Isaku, 40 vjeç, i cili udhëtonte nga Madridi, kishte paraqitur dokumente me identitet fals (me gjenealitete Ermir Isaku). Nga verifikimet e mëtejshme dhe shkëmbimi i informacioneve, ndërmjet strukturave të INTERPOL, ka rezultuar se ky shtetas ishte në kërkim ndërkombëtar, pasi Gjykata e Apelit e Firences, në vitin 2018, e ka dënuar me 5 vjet burgim, për veprën penale “Vjedhja me dhunë”, kryer në kuadrin e organizatës kriminale.” – njofton Policia.
Eduart Isaku është arrestuar provizorisht dhe për ekstradimin e tij në Itali, po bashkëpunojnë Interpol Tirana dhe Interpol Roma.
