Administrata e Presidentit të SHBA-së, Donald Trump, po shqyrton një plan për të ulur tarifat masive të vendosura më parë për mallrat e importuara nga Kina, raportoi të enjten gazeta New York Post, duke cituar burime të njohura me çështjen.
Masa thuhet se do të hyjë në fuqi që javën e ardhshme dhe do të mbetet në fuqi gjatë bisedimeve tregtare midis Pekinit dhe Uashingtonit.
Zyrtarë të lartë nga Kina dhe SHBA-ja do të takohen të shtunën në qytetin zviceran të Gjenevës për të zhvilluar negociata, pasi vendet me dy ekonomitë më të mëdha në botë kërkojnë të ulin tensionet që kanë rezultuar në një embargo tregtare de facto të ndërsjellë.
Tarifa gjithëpërfshirëse prej 145% mbi importet kineze do të reduktohet në 50% deri në 54%, sipas New York Post, i cili citoi burime pranë negociatave. Tarifat tregtare mbi vendet fqinje të Azisë Jugore mund të ulen në 25%, i tha një burim tabloidit.
Duke komentuar mbi uljen e raportuar, zëdhënësi i Shtëpisë së Bardhë, Kush Desai, i tha medias se çdo vendim mbi tarifat do të vinte direkt nga presidenti, duke shtuar se “çdo gjë tjetër është thjesht spekulim i pastër”.
Marrëdhëniet midis Uashingtonit dhe Pekinit janë tensionuar për shkak të vendimit të Trump për të vendosur tarifat më të larta ndonjëherë mbi eksportet kineze në SHBA. Presidenti përmendi sigurinë kombëtare dhe shqetësimet në lidhje me çekuilibrin tregtar për të justifikuar masën. Autoritetet kineze, nga ana tjetër, kanë akuzuar Shtëpinë e Bardhë për “ngacmim ekonomik” dhe janë hakmarrë me tarifa prej 125% mbi të gjitha importet amerikane dhe kanë futur kontrolle mbi eksportet.
Më herët këtë javë, Ministria e Tregtisë e Kinës konfirmoi se zëvendëskryeministri He Lifeng do të takohet me Sekretarin e Thesarit të SHBA-së, Scott Bessent, për bisedime ekonomike dhe tregtare gjatë vizitës së tij në Zvicër këtë fundjavë.
Të enjten, Trump shprehu shpresën se të dy vendet mund të zgjidhnin mosmarrëveshjet e tyre dhe të arrinin një marrëveshje që do të përfitonte të dyja palët.
