Me rënien e Laçit në Kategorinë e Parë, kanë nisur “firot”. Para pak ditësh, braziliani Uilliam Kordeiro Melo zyrtarizoi përmes rrjeteve të tij sociale “divorcin” me klubin bardhezi pas dy vitesh.
“Fundi i një cikli. Kalova dy sezone me këtë fanellë, për të cilën kontribuova me shumë kënaqësi. Dëshiroj të falënderoj secilin pjesëtar të klubit, presidentin Pashk Laska, Dario Palin dhe gjithë ekipin. Dhe faleminderit të gjithë tifozëve që na kanë mbështetur gjithmonë. Më vjen keq që nuk i arritëm qëllimet tona për të qenë në vendin e duhur, që është Superliga. Faleminderit shumë! Para Laçi”, shkroi braziliani.
Fakti që me Laçin ka bërë dy sezone të mira dhe ka treguar nivel të kënaqshëm, e bën Kordeiron një opsion për klubet e Superiores, mes tyre edhe Partizanin.
Braziliani ka kontribuar për “Demat” në të shkuarën në periudhën 2019- 2021, ku ka arritur të bëjë mjaft mirë. Në klubin e kuq për momentin janë në periudhë reflektimi, por kjo nuk do të thotë se 31-vjeçari nuk është një opsion për Partizanin.
Cilësitë dhe eksperienca e një lojtari si Kordeiro mund t’i bënin mjaft punë Partizanit. Gjithsesi, burime pranë gazetës bëjnë me dije se edhe Tirana është një opsion për Kordeiron.
Bardheblutë kërkojnë të përforcojnë ekipin dhe një prej emrave në listën e dëshirave është edhe braziliani, i cili pritet të vendoset vetëm pasi t’i ketë dëgjuar të gjitha ofertat. Në 30 ndeshje, Kordeiro shënoi 9 gola dhe dhuroi 3 asiste me Laçin.
