Edi Rama ka mbajtur këtë të enjte mitingun përmbyllës në Qarkun e Vlorës, ku ka kërkuar më shumë se 8 deputetë nga ky qark, nga numri i mandateve që mori edhe në vitin 2021.
Në të ashtuquajturën “memorandumi i Kuçit”, Rama e kishte shënuar mandatin e 9 në Vlorë me 50% mundësi, gjë e cila lë të kuptohet se ka pak gjasë të ndodhë.
Rama tha se nuk është mirë që PS të ngjitet në rreth 80 mandate dhe Qarku i Vlorës të mbetet ende me 8 deputetë, me të gjithë atë nam që i ka dalë sipas tij.
Edi Rama: Një shoku im nga Tirana kishte parë memorandumin e Kuçit, më shkruajti si ka mundësi që mandatin e 9 të Vlorës e vure me 50%. I thashë ‘pse’. Vlora mos të nxjerri 9 mandate për ty tha, s’ka mundësi. Ti nuk i njeh vlonjatët i thashë. Vlora mund të nxjerrë edhe 10 mandate. Problemi si të nxjerr Vlorën nga shtëpia. Çdo vlonjat e vlonjate në 11 maj duhet të lërë të vërtetën e madhe që i di vetë të tëra dhe duhet të dalë nga shtëpia.
Se mua ma ha mendja se me tërë këto transformime Vlorës, e me tërë këtë nam që i ka dalë, e me tërë atë xhelozi për Vlorën për shkakun tim, nuk është mirë që PS të ngjitet në 80 e kusur mandate dhe Vlora të mbetet te 8. E di që vlonjatët i dinë vetë të tëra. I siguroj të tërë në Vlorë, Selenicë, Himarë, që nëse në këto vite është bërë për Vlorën sa çnuk është në tërë vitet e marra së bashku, në 4 vitet në vijim do bëjmë për Vlorën gjëra që sot duken të pamundura.
