Për 1 javë u ndërprenë gjyqet në Gjykatën e Lartë dhe Gjykatën Kushtetuese, sepse shumica e gjyqtarëve fluturuan në Santo Domingo të Republikës Domenikane, të organizuar nga ish deputeti i PS-së, Alket Hyseni, me eksperiencë në tjetërsimin e pronave në Jug dhe metodat e pastrimit të parave.
World Jurist Association (WJA) ishte alibia ideale për të bërë plazh në një nga destinacionet më të lakmuara të botës së turizmit, Punta Cana.
Për në Karaibe u shkul i gjithë sistemi i drejtësisë shqiptare, në një kohë kur në Shqipëri po diskutohet vetëm për mungesën e drejtësisë. Kur politika, zgjedhjet, debati publik kanë si lajtmotiv kryesor “Drejtësinë”, kjo e fundit shkon e paketuar për turizëm.
“Teatri” i World Jurist Association
Nëse dikush do të kërkonte një mënyrë ekonomike për të pozuar si figurë ndërkombëtare në një event prestigjioz, atëherë anëtarësimi në World Jurist Association (WJA) është opsioni ideal. Me vetëm 99.99 dollarë në vit, çdo jurist nga çdo vend në zhvillim i botës mund të bëhet pjesë e kësaj organizate dhe, me pak dredhi, mund të inskenojë edhe një spektakël politik.
Çfarë është World Jurist Association?
WJA nuk është një organizatë qeveritare, nuk është një trupë zyrtare ndërkombëtare dhe nuk ka ndonjë fuqi ligjore. Është thjesht një OJQ me një faqe interneti dhe një skemë të thjeshtë anëtarësimi, ku organizimi përkujdeset të respektojë burra të përfunduar nga mosha, profesioni dhe pushteti, të cilët bëjnë ‘pelegrinazh’ në vendet ku ka shumë nevojë për turizëm juridik. Një prej tyre ishte Republika Domenikane që organizoi eventin me pjesëmarrjen e 700 studentëve të juridikut domenikan, nga të cilët 500 ishin vajza, shumica të bukura dhe shumë të bukura.
E themeluar për të promovuar “Paqen përmes Sundimit të Ligjit”, WJA ofron një hapësirë ku juristë çfarëdo nga mbarë bota, mund të bëhen pjesë dhe të shkruajnë në biografinë e tyre “jam anëtar i një organizate ndërkombëtare”.
Kjo OJQ u paraqit si “Event Diplomatik” disa muaj më parë kur Kryeministri Edi Rama, mjeshtër i skenografisë politike, bëri atë që di më mirë: e shiti këtë event në Spanjë, si një ngjarje të rëndësishme për Shqipërinë. Postimet në Instagram dhe pamjet madhështore nga Madridi krijuan përshtypjen se Shqipëria po merrte një rol qendror në një ngjarje të rangut të OKB-së.
Në të vërtetë, WJA është një event privat, ku çdo jurist i thjeshtë mund të bëhet anëtar, të marrë pjesë në konferenca dhe, me pak mungesë cipe, të pozojë për një foto me një mbret ose kryeministër.
Aq liberale është anëtarësia në WJA, sa aty mund të marrë pjesë gjithë trupa e shkarkuar nga vetingu bashkë me atë që doli e ‘pastër’. Aty mund të qëndrojnë bashkë Sokol Sadushi me Gjin Gjonin, Altin Dumani me Alaudin Malajn. Në kongreset e WJA-së mund të bëhen bashkë të gjithë batakçinjtë e shkarkuar dhe aktivë të politikës.
Gjithçka që nevojitet për të marrë pjesë në eventet e WJA-së, është një sfond njerëzish, kundrejt një pagese minimale vjetore.
Shumica e domenikaneve të reja në kongresin e Santo Domingos u futën nëpër panele pa para. Nuk është çudi që çdo juriste shqiptare mund të bëhet pjesë dhe të pretendojë të njëjtën “arritje”, sepse Shqipëria u “zgjodh” si vend organizator i World Law Congress 2027.
Kongresi i Santo Domingos kishte temën “Gjeneratat e reja dhe sundimi i ligjit. Formimi i së ardhmes”. Për juristët e së ardhmes në Republikën Domenikane referuan “pleqtë” e së tashmes nga e gjithë bota.
Më shumë referues vinin nga Shqipëria. Dy ekipe futbolli me gjyqtarë të lartë, magjistratë e pedagogë fluturuan për 22 orë për në Republikën Domenikane. Ata paralizuan sistemin shqiptar për të ndihmuar panelet e kongresit domenikan, sakrifikuan dy ditë rrugë për tre ditë aktivitet.
E gjitha për një kauzë shumë të lartë: Nuk të vjen përherë rasti të bësh plazh në Punta Cana. Pse vetëm plazh në Karaibe?! Si u argëtuan ‘ustallarët’ e drejtësisë në Shqipëri pas konferencave dhe a vijoi shkëmbimi i eksperiencave me studentet e bukura domenikane?/ Prapaskena.com
