I riu që shihni në foton e mësipërme është 24-vjeçari shqiptar nga Kosova, Endrit Ademi, i cili ka gjetur vdekjen tragjikisht mëngjesin e sotëm në një aksident në vendin e punës në Milano të Italisë
Mediat italiane shkruajnë se i riu humbi jetën në një kantier ndërtimi në rrugën “Edoardo Bassini”. Vdekja e tij erdhi pasi ra nga një lartësi prej dymbëdhjetë metrash. Endrit Ademi ra nga një skelë e lëvizshme në oborrin e brendshëm të pallatit ku po punonte. Në ndërtesë ishin duke u kryer punime lyerjeje pas një ndërhyrjeje që kishte përfshirë të gjithë objektin.
Endriti po punonte në katin e tretë. Skela ku ai ndodhej kishte një barrierë mbrojtëse më pak se një metër të lartë. Por 24-vjeçari, për arsye ende për t’u sqaruar, pak para orës 10:00, ra prapa dhe barriera nuk e mbajti. Ndoshta e humbi ekuilibrin, shkruajnë mediat në Milano.
Mbërritja në vendngjarje e personelit të Ndihmës së Urgjencës Rajonale (Areu) ishte e kotë, për punëtorin e ndërtimit nuk kishte më asgjë për të bërë. Në vendin e aksidentit ishin të pranishëm edhe agjentët e policisë lokale, karabinierët, ATS (Agjencia për Mbrojtjen e Shëndetit) dhe zjarrfikësit,.
Dinamika e aksidentit fatal po hetohet nga policia lokale dhe personeli i ATS-së së Milanos.
Shqiptzari nga Kosova humbi jetën, ndërsa shpëtoi pa u lënduar kolegu i tij, të dy punonjës të një firme nga zona e Brescias, të cilët ndodheshin atje për të lyer ndërtesën.
Disa kolegë të pranishëm në kantier në momentin e aksidentit e përshkruan 24-vjeçarin si një “djalë shumë i mirë dhe një punëtor i shkëlqyer”. Banonte në Rovato, provincën e Brescias. Jetonte i vetëm, sepse familja e tij kishte mbetur në vendlindje, raportojnë mediat italiane.
