Është ekstraduar nga Mbretëria e Bashkuar drejt vendit tonë, 33-vjeçari Mikel Hoxha.
Ai ishte në kërkim ndërkombëtar pasi Gjykata e Apelit Durrës, më 13 dhjetor 2021, e ka dënuar me 5 vjet burg për veprat penale “Plagosje e rëndë me dashje” dhe “Mbajtje pa leje dhe prodhim i armëve, armëve shpërthyese dhe i municionit”.
Ngjarja që çoi në dënimin e tij ndodhi më 6 qershor 2018 në qytetin e Gramshit. Në sheshin e qytetit, Hoxha ka qëlluar me armë zjarri, duke plagosur Admir Harunin, banor i zonës. Skena e krimit ndodhi pikërisht përpara komisariatit të policisë së Gramshit.
Njoftimi:
Ekstradohet nga Mbretëria e Bashkuar, një shtetas i dënuar me 5 vjet burgim, për plagosje të rëndë me dashje dhe për armëmbajtje pa leje.
Si rezultat i bashkëpunimit ndërmjet Interpol Tiranës dhe Interpol Mançester, Mbretëria e Bashkuar, u krye ekstradimi nga Mbretëria e Bashkuar drejt vendit tonë i shtetasit shqiptar Mikel Hoxha, 33 vjeç.
Shtetasi Mikel Hoxha ishte shpallur në kërkim ndërkombëtar, pasi Gjykata e Apelit Durrës, në vitin 2021, e ka dënuar me 5 (pesë) vjet burgim për veprat penale “Plagosje e rëndë me dashje”, “Mbajtje pa leje dhe prodhim i armëve, armëve shpërthyese dhe i municionit”.
Përmbledhje e ngjarjes së ndodhur:
Shtetasi Mikel Hoxha, në datën 06.06.2018, në qytetin e Gramshit, pas debatit të çastit për motive të dobëta, ka plagosur me armë zjarri në kofshë shtetasin A. H., duke i shkaktuar lëndime serioze.
