Kreu i Partisë “Mundësia”, Agon Shehaj, gjatë takimit me qytetarët e Sarandës, përmendi me emra politikanët e korruptuar në Shqipëri, mes të cilëve Edi Ramën, Olta Xhaçkën, Taulant Ballën e Belinda Ballukun, për të cilët tha kanë marrë peng Shqipërinë.
“Ne kemi me dhjetëra të rinj e të reja ë kanë studiuar jashtë, dhe kthehen sepse duan të japin një kontribut në vendin e tyre. Sa më shumë kanë jetuar në botën e lirë, aq më shumë u vjen inat pse Shqipëria duhet të jetë në dorën e të korruptuarve, si Taulant Balla, si Xhaçka, si Gjiknuri, si Edi Rama, si Balluku”, u shpreh kreu i Mundësisë.
Shehaj tha se politikanë si Balla nuk duhet të kenë më asnjë ditë pushtet, teksa shtoi se Balla është i shqetësuar nga partitë e reja pasi ditën që do humbasë pushtetin, do humbasë edhe lirinë.
“Po dëgjoja dje Taulant Ballën që thoshte, ‘ç’na duhen ne partitë e reja, kemi partitë e mëdha. Sa të rriten partitë e reja…”
Taulanti është shumë i shqetësuar. Taulanti jo vetëm është i shqetësuar për pushtetin politik, por sepse ditën që do humbasë pushtetin, do humbasë edhe lirinë. Aq i përlyer është, por asnjë nuk flet në media.
Para ca kohe, doli dikush i kishte dërguar një sms me numrin e Taulant Ballës një biznesmeni, dhe i kishte thënë: “Jam Taulant Balla dhe më duhen 100 mijë euro. Do të dërgoj dikë që t’i marrë, jepja”.
Dhe i dërgon një taksixhi. Dhe sipërmarrësi i dorëzon 100 mijë euro cash taksistit. E kuptoni me kë kemi të bëjmë. Këtij sipërmarrësi i mjaftoi 1 sms dhe i dorëzoi Taulant Ballës 100 mijë euro. E kuptoni sa të përlyer janë këta njerëz”, tha Shehaj.
Kreu i Mundësisë u shpreh se në 11 Maj është mundësia e shqiptarëve për të larguar “Taulantët” që kanë kapur Shqipërinë.
Shehaj paralajmëroi se drejtësia do të vijë për të gjithë ata që kanë abuzuar me pushtetin. Ai përmendi rastin e hetimeve ndaj Erion Veliajt, duke thënë se askush nuk do të shpëtojë, ndërsa shtoi se “Mundësia” dallon nga të gjithë, pasi është e pa kapur dhe e pakorruptuar.
“Ne dallojmë si nata me ditën me ata, sepse jo vetëm jemi të pakorruptuar dhe të pakapur, por ne nuk njohim as njerëz të ngjashëm me Taulant Ballën. Njerëz si Taulant Balla janë fatkeqësia e këtij vendi.
Fëmijët tuaj janë larguar nga ky vend se njerëz si Taulant Balla kanë kapur Shqipërinë. Me Taulanta është plot Shqipëria. Në 11 Maj duhet të largojmë gjithë “Taulantat” e Shqipërisë.
Taulanti përfaqëson një kategori njerëzish, po mos mendoni se janë kaq të pamposhtshëm. Kemi shembullin e Erion Veliajt. Ai ishte mbreti i Taulantëve, të gjithë mendonin se ishte i paprekshëm, dhe sot është në burg.
Unë jam 100% i bindur që jo vetëm Taulanti e ka radhën, por të gjithë ata shumë shpejt do dalin para drejtësisë. Është një film të cilit ia dimë fundin, e dimë si do përfundojnë. Do përfundojnë në burg, është çështje kohe. Do katadisen aq keq, sa do na vijë keq për ta”, deklaroi Shehaj në Sarandë.
