Një vajzë 14-vjeçare shqiptare ka humbur jetën tragjikisht në Itali, pasi dyshohet se është hedhur nga dritarja e katit të tretë të banesës ku jetonte me familjen. Ngjarja ka ndodhur ditën e djeshme në Massafra, një provincën e Tarantos.
Mediat përtej Adriatikut raportojnë se e mituri është dërguar me urgjencë me shenja jete në spitalin “Santissima Annunziata” të Tarantos, por nuk ka arritur dot të mbijetojë, duke ndërruar jetë vetëm pak minuta pas mbërritjes në spital.
Nëna e saj, e cila ishte me të në shtëpi, thuhet se e pa atë të hidhej nga dritarja pa asnjë arsye të dukshme dhe pa pasur mundësi që të reagonte.
“U hodh vetë, nuk e dimë pse.” – ka deklaruar ajo për autoritetet italiane.
14-vjeçarja shqiptare ishte nxënëse në një shkollë të zonës dhe, sipas mediave italiane, nuk kishte dhënë ndonjë shenjë shqetësimi apo probleme të dukshme që mund të paralajmëronin aktin ekstrem që ajo dyshohet se ndërmori.
Prokuroria ka urdhëruar kryerjen e autopsisë për të sqaruar tërësisht rrethanat e vdekjes. Ndërkohë, hetimet janë marrë përsipër nga karabinierët e Massafras, nën drejtimin e prokurorit Mariano Buccoliero.
Gjithashtu, autoritetet kanë sekuestruar celularin e vajzës, me shpresën se do të gjejnë ndonjë shënim, mesazh apo sinjal që mund të ndihmojë në zbardhjen e plotë të ngjarjes.
Raportohet se tragjedia ka ndodhur në familjen Bozhanaj, e cila është me origjinë nga Dukati i Vlorës.
