Presidenti i SHBA-së, Donald Trump, ka lëshuar një urdhër ekzekutiv duke kërkuar bllokimin e të gjitha fondeve federale për Shërbimin Publik të Transmetimit (PBS) dhe Radion Publike Kombëtare (NPR). Të enjten në mbrëmje, Trump pretendoi se të dy organizatat janë angazhuar në mbulim lajmesh partiake të njëanshme.
Urdhri udhëzon bordin e Korporatës së Transmetimeve Publike, e cila shpërndan fondet për stacionet PBS dhe NPR, që të ndërpresë financimin e drejtpërdrejtë në masën maksimale të lejuar nga ligji. Ai shton se bordi duhet të refuzojë të ofrojë fonde në të ardhmen për organizatat e lajmeve.
“Nuk ka rëndësi se cilat pikëpamje promovojnë NPR dhe PBS. Ajo që ka rëndësi është se asnjëri entitet nuk u paraqet qytetarëve taksapagues një portretizim të drejtë, të saktë ose të paanshëm të ngjarjeve aktuale.”, thuhet në urdhrin ekzekutiv.
Shtëpia e Bardhë ka thënë se financimi i mediave të lajmeve është jo vetëm i vjetëruar dhe i panevojshëm, por edhe gërryes për pamjen e pavarësisë gazetareske dhe se peizazhi mediatik është bërë më i larmishëm. Megjithatë, buxheti i CPB-së është miratuar tashmë nga Kongresi deri në vitin 2027.
Sipas vlerësimeve të tyre, më shumë se 40 milionë amerikanë dëgjojnë radion publike NPR çdo javë dhe 36 milionë shikojnë një stacion televiziv lokal nga rrjeti PBS çdo muaj. Drejtoresha e NPR-së, Katherine Maher, vlerësoi në mars se stacioni radiofonik do të merrte rreth 120 milionë dollarë (90 milionë paund) nga CPB në vitin 2025, “më pak se 5% të buxhetit të tij”.
Të dyja organizatat kanë thënë më parë se përpjekja e Trump për të shkurtuar fondet mund të ketë një “ndikim shkatërrues” tek ata që mbështeten tek ato për lajme të besueshme, përfshirë gjatë situatave të emergjencës. Grupi për të drejtat e medias, RSF, paralajmëroi të premten për “një përkeqësim alarmues të lirisë së shtypit” në Shtetet e Bashkuara nën presidencën e Trump dhe vështirësi “të paprecedentë” për gazetarët e pavarur në të gjithë botën.
