Sali Berisha ka mbajtur këtë të enjte një miting në Belsh në kuadër të fushatë elektorale për zgjedhjet parlamentare të 11 Majit.
Gjatë fjalës së tij, Berisha ka hedhur akuza drejt Qeverisë në lidhje me sistemin e shëndetësisë, ku tha se një shtet me 8 miliardë euro buxhet le pa ilaçe të sëmurët tek Onkologjiku, pasi paratë e ilaçeve Edi Rama i ke vjedhur me drejtorët dhe ministrat.
Po ashtu, Berisha sulmoi edhe dy prej përfituesve më të mëdhenj nga fondet e shëndetësisë, Vilma Nushin dhe Tom Doshin, ku premtoi se kompanive të tyre do t’u vihet dylli pas 12 Majit, pasi sipas tij, shesin ilaçe të paefektshme me niseshte dhe amidon.
Berisha premtoi se do të dyfishojë buxhetin e shëndetësisë dhe do të bëjë një listë me ilaçet e rimbursueshme siç është në Itali. Ai i përmendi Vilma Nushit edhe koncesionin abuziv të “check up-it”
Sali Berisha: Sot ndodh që qindra mijëra pensionistë nuk marrin dot ilaçet. A merren ilaçen me 140 mijë lekë? Ata ose kafshatën, ose ilaçet. Ose qiraja. Pra i zhyti në vetmi. Ua largoi fëmijët. I bëri të flasin me vete, të qajnë me lot mjerimi. Merr fund me 11 maj. Çfarë do bëjmë ne? Ne do ua kthejmë paratë ju. Nuk do ketë rrogë minimale nën 500 euro. Nuk do ketë rrogë mesatare nën 1250 euro. Nuk do ketë rrogë për mësuesin nën 1500 euro. Mjekëve dhe infermierëve do u dyfishohen rrogat.
A mundet një shtet me 8 milardë euro buxhetin, të lërë pa ilaçe, të lërë në kthetrat e vdekjes të sëmurët në Spitalin Onkologjik? Në vitin 2010 apo 2013, ne kishim gjysmën e këtij buxheti, po pa ilaçe nuk mbetën kurrë ata. Nuk mundet kurrsesi. Janë përparësi absolute. Kurse zotëria e tij thotë, atje janë bërë krime kundër njerëzimit. Po nëse janë bërë krime kundër njerëzimit dhe ti kryeministër, që disponon financat e shtetit, nuk merr asnjë masë edhe sot pas 3-4 muajsh, ato krime i ke kryer vetë ti. Ato para të ilaçeve i ke vjedhur me drejtorët dhe ministrat e tu. Pastaj thua mjekët, jo mo jo, mjekët nuk bëjnë tendera për ilaçe, ato i bën ministria, i bën drejtoria.
Ne u premtojmë ju, Edmir ku ju, ku shkoi Çekrezi, se e keni një përfaqësues të shquar, që ju nderon në diasporë, ne zotohemi këtu se do adaptojmë një për një listën e rimbursimit që ka republika italiane. Po çfarë po bëjmë? Ne po u japim shqiptarëve gjërat bazë. Dhe jo ilaçet me niseshte dhe amidon të Vilma Nushit dhe Tom Doshit, të cilat janë absolutisht të paefektshme. Dylli i pret që të dy. Me 12 maj, kompanitë e tyre do dyllosen. Programi ynë pra është dyfishimi i buxhetit për shëndetësinë.
Bën checkupin me zonjën e kushëririt të vet se ndajnë paratë, dhe nga checkupi janë të përjashtuar të gjithë pensionistët, por checkupi nuk ka asnjë vlerë tek të tjerët, përveçse tek pensionistët. Çdo pensionist do ketë të drejtë analiza të plota në vit dy herë falas, të garantuara nga shteti.
