Janë zbardhur detaje të reja nga vrasja e 58-vjeçarit Renato Hoxhaj, i cili u ekzekutua me armë zjarri pistoletë në orët e para të mëngjesit të djeshëm në qytetin e Vlorës, në shkallët e hyrjes së banesës së tij.
Mësohet se viktima kishte shtëpinë në një vend shumë të lakmuar për ndërtime të reja dhe burime për mediat bëjnë me dije se ia kishin kërkuar tokën për ndërtim.
Të njëjtjat burime pohojnë se Renato Hoxhaj nuk kishte pranuar ta jepte dhe kohët e fundit ishte shfaqur i shqetësuar pasi kishte marrë kërcënime të ndryshme, por sërish nuk kishte pranuar.
Kjo është edhe pista kryesore ku po heton Policia e Vlorës, teksa kanë kaluar më shumë se 48 orë dhe vrasja vijon të jetë ende pa autor dhe e mbushur me mister.
Vetëm disa metra larg banesës së 58-vjeçarit është ndërtuar një pallat disa katësh, ku çmimet e apartamenteve kanë shkuar deri në 1500 euro metri katror. Mësohet se grupi hetimor ka marrë në pyetje disa persona, përfshirë pronarin e pallatit të ndërtuar pranë banesës të viktimës.
Burime për mediat bëjnë me dije se në kontakte me të afërm, ai ishte shprehur “kam marrë kërcënime për shtëpinë me qëllim që aty të ndërtohet, por do të rezistoj”. Në zonë ai njihej si një person i qetë dhe pa probleme aspo konflikte.
Viktima punonte si roje, teksa sipas bashkëjetueses së tij, prej rreth 1 viti e gjysmë, ai nuk qëndronte më në punë natën, por vetëm ditën.
58-vjeçari u qëllua 4 herë, ku fillimisht kishte marrë një plumb një plumb në trup dhe dy herë në kokë, nga një distancë e afërt. Momentalisht dyshohet se kemi të bëjmë vetëm me një person që ka kryer krimin, i cili është kapur nga një kamer sigurie në momentin kur largohet, por ka qenë i maskuar me kapele dhe shall.
Nga hetimet paraprake dyshohet se autori ka hyrë nga një rrugicë pas pallatit ku 58-vjeçari punonte, duke i dalë këtij të fundit përballë. Nuk përjashtohet mundësia që personi që ka kryer krimin të jetë ndihmuar me informacione të bollshme rreth lëvizjeve dhe vendndodhjes së tij.
58-vjeçari jetonte i vetëm në shtëpi, teksa prej dy vitesh bashkëjetonte me një grua të komunitetit rom. Ishte babai i dy fëmijëve të rritur. Gruaja e tij e parë jetonte në Itali dhe shpesh fëmijët vinin për ta takuar.
