Nga Boldnews.al
Kompania e familjes Lluca ka fituar një tender me fond limit rreth 1.5 milionë euro, saktësisht siç kishte raportuar “Boldnews.al” rreth dy muaj më parë, kur procedura tenderuese për rikonstruksionin e rrugës “Skuraj” ishte vendosur në Regjistrin e Parashikimeve të Agjencisë së Prokurimit Publik (APP), por ende nuk ishte shpallur zyrtarisht.
Një burim anonim, me shumë mundësi një lloj “Nesti Angoni” brenda Bashkisë së Kavajës, informoi redaksinë në fund të Shkurtit 2025 se tenderi me objekt “Rikonstruksioni i rrugës Skuraj”, me fond limit 150.000.000 lekë ishte destinuar për biznesin e familjes Lluca nga Elbasani.
Denoncuesi sugjeroi të dhëna, të cilat në vlerësimin e tij ishin konkrete, mbi bazën e të cilit krijojnë dyshimin se fituesi është përzgjedhur para se të shpallet tenderi, duke ngritur alertin për një rast tipik të shkeljes së barazisë në tendera.
“Nesti” i Kavajës duket se ka pasur informacion thuajse 100 përqind të saktë. Në 23 Prill 2025, pra, rreth 50 ditë pas publikimit të “Boldnews.al” mbi dyshimet për tender të paracaktuar, bashkia e drejtuar nga Fisnik Qosja shpall rezultatet e procedurës tenderuese.
Fituesi; një kompani e familjes Lluca.
Tenderi i dyshimtë
Referuar të dhënave zyrtare, rezulton se në procedurën tenderuese me fond 1.5 milionë euro kanë marrë pjesë tre konkurentë; (1) bashkimi i operatorëve “T&J Construction” dhe “Valona Konstruksion” me ofertë ekonomike 142.410.000 lekë të reja; (2) “ASI-2A co” shpk, me ofertë ekonomike 149.379.464 lekë të reja, dhe; (3) “Star Trade Albania”, pa ofertë ekonomike.
Pas shqyrtimit të ofertave, Bashkia e Kavajës shpalli fitues bashkimin e operatorëve “T&J Construction” dhe “Valona Konstruksion”, pasi më herët skualifikoi “Star Trade Albania” për mungesë oferte, si edhe “Asi-2A co”, me ofertë gati 99 përqind të fondit limit, për mungesa të theksuara në dokumentacion, aq sa krijon dyshimin se është përfshirë në tender me qëllimin për të mos fituar.
Në raportimin e mëparshëm, “Boldnews.al” mori denoncimin se fituesi i paracaktuar ishte kompania “Lluca” shpk, në pronësi të Naim, Blerim e Gabriel Lluca.
Kompania “Lluca” nuk rezulton të ketë marrë pjesë në tender. Megjithatë, familja elbasanase ka fituar tenderin 1.5 milionë euro të Bashkisë së Kavajës.
Kompania “T&J Konstruksion”, e cila është pjesë e bashkimit të operatorëve fitues, zotërohet në 50 përqind të saj nga Emilian Lluca, djali i Naim Llucës, aksionerit kryesor të “Lluca” shpk.
Shoqëria “T&J Konstruksion” është krijuar në vitin 2022 në Elbasan, fillim me ortak të vetëm, Julian Manahasa. Në fund të dhjetorit 2024, Manahasa i shet 50 përqind të aksioneve tek Emilian Lluca për 50 mijë lekë të reja. Pak muaj më pas, dyshja Lluca-Manahasa përfshihën në bashkimin e kompanive fituese të tenderit të zhvilluar nga Bashkia e Kavajës.
Dyshimet për paracaktim/ Tender 1.5 mln euro i Bashkisë Kavajë do të fitohet nga “Lluca” sh.p.k?
