Nga Boldnews.al
Një tender i Bashkisë së Kavajës, me vlerë 1.5 milionë euro, për rikonstruksionin e rrugës Skuraj dyshohet se ka fituesin e paracaktuar, përpara se procedura të nisi zyrtarisht.
Bashkia e Kavajës, e drejtuar nga Fisnik Qosja, ka publikuar në Regjistrin e Parashikimeve të Agjencisë së Prokurimit Publik (APP) për vitin 2025, tenderin “Rikonstruksion i rrugës Skurraj”, me fond limit 150 milionë lekë të reja.
Deri në momentin e publikimit të këtij shkrimi, ky tender ende nuk rezulton i vendosur në rubrikën “Njoftimi i shpalljes së kontratës” të APP-së, gjë që do të thotë se ende nuk është i hapur për të pritur oferta nga subjekte private.
Megjithatë, disa të dhëna të siguruara në avancë nga “Boldnews.al” krijojnë dyshime të forta se tenderi duket se është i projektuar për një kompani private.
Informacionet e mbërritura në formën e denoncimit në adresën e redaksisë thonë se tenderi 1.5 milionë pritet të fitohet nga kompania “Lluca” shpk.
Denoncuesit sugjerojnë të dhëna, të cilat në vlerësimin e tyre janë konkrete, mbi bazën e të cilit krijojnë dyshimin se fituesi është përzgjedhur para se të shpallet tenderi, duke ngritur alertin për një rast tipik të shkeljes së barazisë në tendera.
Shoqëria “Lluca” është krijuar në vitin 2003 dhe është në pronësi të Naim, Blerim e Gabriel Lluca. Ajo e ka selinë në fshatin Përparim të Elbasanit. Referuar të dhënave publike të “openprocurment”, subjekti “Lluca” shpk ka fituar tendera kryesisht në institucionet vendore, kryesisht në rajonin Rrogozhinë-Peqin-Elbasan.
Referuar të njëjtin burim informacioni, “Lluca” shpk ka arkëtuar nga fondet publike mbi 3 milionë euro për periudhën 2019-2025.
Vepra penale e “shkeljes së barazisë në tendera” është kompetencë hetimore e Prokurorisë së Posaçme (SPAK), pas ndryshimeve të Kodit të Procedurës Penale, në kuadër të Reformës në Drejtësi.
Aktualisht, dhjetra procedime me një numër të lartë zyrtarësh publikë, po hetohen ose gjykohen për këtë vepër penale.
Pas hekurave për “shkelje të barazisë me tendera” kanë përfunduar zyrtarë të nivelit të lartë, përfshirë ministra e kryebashkiakë, si edhe shumë zyrtarë të niveleve të ndryshme, në administratën qendrore e lokale.
