Xhuliano Bregasi, aktivist pranë Lëvizjes Bashkë, ka denoncuar shpërdorimin e parave publike nga qeveria Rama.
Gjatë një postimi në rrjetet sociale, Bregasi deklaron se hekurudha Tiranë-Durrës-Rinas jo vetëm që nuk është gati të hapet në afatet e parapërcaktuara, por po ndërtohet me dyfishin e kosotos.
Gjithashtu Bregasi ironizon edhe ndërtimin e aeroportit të Kukësit, ku sipas tij, ngrihen vetëm shpendët.
Reagimi nga Xhuliano Bregasi:
“Hekurudha Tiranë-Durrës u ndërtua në vitet 1948-1949. Për më pak se një vit, nga puna e mijëra aksionistëve, me mjetet e prapambetura të kohës.
Pas 64 vjetësh, në vitin 2013, me ardhjen në pushtet të Edi Ramës dhe me prishjen e stacionit në Tiranë nga Lulzim Basha (kryetar bashkie), trenit pushoi së ardhuri në Tiranë.
8 vjet më pas, në fillim të shkurtit 2021, qeveria e Edi Ramës u kujtua të niste punimet për rindërtimin e hekurudhës, me kosto 70 milionë euro dhe afat punimesh 30 muaj (deri në korrik 2023).
Në korrik 2023, punimet ishin “60% dhe hekurudha do të hapej në pranverë 2024”.
Në maj 2024, punimet ishin “70% dhe hekurudha do të hapej në mars 2025”.
Në 28 prill 2025, punimet janë “90% dhe hekurudha do të hapet në mes të vitit 2026”.
Kostoja ka shkuar 140 milionë euro deri tani, nga 70 milionë të parashikuara.
Llogariteni vetë sesa do zgjasë ai 10%. Llogarisni edhe sesa mund të shkojë kostoja përfundimtare, nga xhepat tanë në xhepat e pushtetarëve dhe klientëve të Edi Ramës. (Llogarisni edhe sesa do zgjasë ndërtimi i hekurudhës për në Kosovë ♂️)
Edi Rama që ka lëshuar 2 satelitë në hapësirë, që ka ndërtuar 2 aeroporte ku ngrihen vetëm shpendët (Kukës) ose përzihen shpendët në shkelje në konventave mjedisore ndërkombëtare (Vlorë), që është rrotë më rrotë me botën për kullat më të larta të korrupsionit dhe drogës, nuk ndërton dot 30 kilometra hekurudhë për 5 vjet dhe me 140 milionë dollarë. Të njëjtën hekurudhë që dikur u ndërtua për 11 muaj me kazma e lopata.
Në fund fare, bëni hesapet për kohëzgjatjen e pasaportës së BE-së dhe çdo mashtrimi tjetër elektoral që lëshon Edi Rama me breshëri si trena supersonikë.
Edi Rama në 12 vjet ka bërë gjithçka për t’na treguar që nuk mundet të ndërtojë as shtet, as ekonomi të shëndoshë, as mirëqenie, as drejtësi, as barazi shoqërore, as hekurudhë.
Më 11 maj nuk ka zgjedhje të zakonshme, por zgjedhje vendimtare nëse Edi Rama do shporret nga pushteti për të marrë shinat e trenit, apo do vazhdojë të vuajë një popull i tërë për faj të tij.
Lëvizja BASHKË dhe Arlind Qori janë e vetmja alternativë për të ndërtuar një shtet zhvillimor, social dhe të së drejtës, e për t’i dhënë fund njëherë e mirë pabarazisë dhe padrejtësive shoqërore në këtë vend!”, shkruan Bregasi.
