Kandidat i PD në qarkun Tiranë, Arjan Hoxha hodhi akuza në drejtim të kryetarit të Bashkisë së Kamzës, Rakip Suli.
Hoxha tha se kryetari i Bashkisë Kamëz, Rakip Suli ka bërë disa shkelje, duke shtuar se nuk mund të bëhen tendera rrugësh 4 muaj para zgjedhjeve. Ai shton se sipër baltës po hidhet asfalt.
“E kam akuzuar z Suli se ka bërë tenderime 4 muaj para zgjedhjeve, për të intimiduar zgjedhësit në formë tjetër. Kryetari i Bashkisë Kamëz Rakip Suli ka bërë disa shkelje, Nuk mund të bëhen tendera rrugësh 4 muaj para zgjedhjeve, sipër baltës hidhet asfalt. Pra, janë rrugë skandaloze, që prishen për pak kohë. Kemi adresuar problematikat dhe shkeljet. Rilindja po tenton që të pengojë votuesit, që të shprehin vullnetin, pasi disa votues kanë larg qendrën e votimit”, tha Hoxha në News24.
Hoxha deklaron po ashtu se për simpatizantët e PD në zonën e Kamzës ka diskriminim në shërbime publike.
“Ka diskriminim në pushtetin qendror dhe atë vendor. Ka familje që nuk mbyllin dot muajin, që kalojnë muajin me 8500 lekë të reja në muaj. Ka diskriminime për shkak të bindjes politike. Ka probleme me papunësinë, ka probleme me braktisjen masive. Nëse nuk bie gongu që të ikë ky regjim, qytetarët thonë se do largohen dhe ata që kanë mbetur. Data 11 Maj është mision në shërbim të kombit shqiptar. Është situatë paniku, sikur ky vend është pushtuar. Unë jam kandidat i PD për qarkun Tiranë dhe njoh problematikën më mirë në Kamëz e në Paskuqan. Në disa zona ka mungesë të shërbimeve të energjisë elektrike. Nuk ka shërbim sepse qytetarët janë me PD-në. Nesër me PD në qeveri, ne iu kthejmë dinjitetin. Rama ka mungesë etike, kur flet me atë gjuhë denigruese, bullizon njerëzit, ai etiketon qytetarët. Këtu nuk ka institucione. Rama ka ngrënë dardha e molla bashkë me ata që kanë vjedhur”, deklaroi ai.
