Pogradeci dhe Besa ja dolën mbanë të siguronin finalen e play off-it të Kategorisë së Parë, ku do të përcaktohet ekipi që do të përballet me vendin e 8-të të Kategorisë Superiore.
Pogradeci ka mundur Burrelin 0-1 në fushën e këtij të fundit duke e eliminuar nga gara.
Skuadra e drejtuar nga Ardian Mema, u tregua më konkrete në pjesën e parë të ndeshjes, duke sulmuar e gjetur avantazhin me Krasniqin.
Më pas ata u mbrojtën me kujdes duke mbajtur larg portës sulmin e vendasve për të mos shënuar një gol barazimi që do të favorizonte ekipin e Burrelit falë formulës së këtij turi.
Kështu, me vërshëllimën përfundimtare Pogradeci siguroi kalimin më tej, ndërsa Burreli, edhe pse kishte bërë një sezon të shkëlqyer duke marrë vendin e katërt, nuk ia doli të vazhdonte rrugëtimin në play-off për ëndrrën Superiore.
Nga ana tjetër Besa arriti një kualifikim dramatik përballë Apolonisë. Formula i ka buzëqeshur kavajasve pasi ndonëse dominuan takimin, nuk gjetën hapësirat të shënonin rastet e krijuara.
Përkundrazi, ishin miqtë që shënuan të parët pak minuta para fundit dhe prekën mundësinë e kalimit ata në turin tjetër.
Por goditja me kokë e Abdulait pak minuta para fundit të sfidës barazoi shifrat.
Meqë formula e play-off e quan barazimin “fitore” për ekipin e pozicionuar më mirë në sezonin e rregullt, Besa siguroi vazhdimin më tej në turne duke mbajtur gjallë ëndrrën për Superioren.
