Në muajin prill 2024, u arrestua nga Policia e Kosovës një prej të dyshuarve si pjesëtar i grupit Albkings që shpërndante foto dhe video intime të vajzave në platformën Telegram.
Grupi Albkings në rrjetin Telegram u kthye në shumë pak kohë në tmerrin e grave dhe vajzave jo vetëm në Kosovë, por edhe në Shqipëri duke shpërndarë foto dhe video intime, shoqëruar me numra telefoni. Kjo platformë jo vetëm denigronte vajza dhe gra por u bënte edhe shantazh për publikimin e videove. Për këto raste nisën hetime edhe nga Krimi Kibernetik në Tiranë.
Në redaksinë e emisionit “Stop” kanë mbërritur dy denoncime me këtë problematikë. Një qytetar tregon se është futur për të luajtur dhe ka parë video të ndryshme të vajzave.
Ai thotë se aplikacioni Discord është për të komunikuar dhe anëtarët luajnë një lojë, por aty ka grupe që dërgojnë video erotike të vajzave minorene dhe jo vetëm. Denoncimi i dytë vjen nga një prind që ka parë në telefonin e fëmijës këto aplikacione.
“Stop” siguron pamje të këtyre komunikimeve të papërshtatshme. Tomi Kallanxhi, ekspert IT, tregon se Telegrami është i mbyllur për sa i përket sigurisë dhe vetëm mund të kapen personat pasi vetë aplikacioni nuk i kontrollon dot. Sa i përket aplikacionit Discord do të duhet që të komunikohet nga autoritetet shqiptare për mbylljen e tij.
