Nga Klodian Tomorri
Pasi i doli boja non gratas, Edi Rama e ndryshoi strategjinë e fushatës duke nxjerrë si kalë beteje pasaportën europiane.
Pasi i doli boja dhe pasaportës europiane, ndryshoi sërish. Këtë herë kali u bë buf dhe kundërshtari kënetë.
Me sa duket i ka dalë boja dhe kësaj pune së bufit dhe kënetës. Tani kalë beteje janë bërë lapsuset e Berishës dhe nëpër të kënga Latifi-sherifi.
Ka lëshuar të gjitha mediat afër tij ta pikturojnë Berishën si një i moshuar që ka rrjedhur nga trutë. Shikoni lajmet, por shikoni dhe analizat e analistëve të pavarur të qeverisë. Të gjithë po merren me lapsuset e Berishës. Jo ngatërroi datën e zgjedhjeve, jo tha një m*t heshtje për Papën.
Tani kjo është shumë interesante.
Sepse më shumë gjasa që të ngjiste kishte ajo puna e bufit ose pasaportës europiane se sa kjo e Berishës që nuk është i aftë mendërisht.
Nëse ka një fushë ku duhet t’i rrish larg betejes me Berishën është kjo puna e mendjes dhe intelektit. Ai aty të çan daullen, s’të jep shans për garë fare. Kjo vlen edhe për njerëz që vijnë nga bota akademike, jo më për dikë me CV modeste.
Por ka dhe një gjë tjetër, po kaq interesante. Sa herë që ndryshon strategjia, aq herë ndryshojnë për poshtë dhe projeksionet e fitores spektakolare.
Me strategjinë e non gratas ishte varianti i 115 deputetëve.
Kur hyri në lojë bufi, projeksioni zbriti tek 80-a.
Ndërsa tani me Berishën e rrjedhur, ka shkuar kursi tek 71-shi, pazari i fundit.
Mos e ndrysho më strategjinë komandant se po na bie projeksioni poshtë 60-s me këtë ritëm dhe na ngeli Shqipëria pa hyrë në Europë.
Nuk e mban dot Shqipëria këtë barrë mbi supe.
