Makina tip “Land Rover” e autorëve të vrasjes së Gjovalin Prendit, e cila u gjet e djegur në fshatin Gjormë të Kurbinit, ka rezultuar e vjedhur në Peqin më 13 Mars të këtij viti.
Kjo e dhënë po analizohet nga policia dhe prokuroria e Lezhës, e cila vijon hetimet për të rënë në gjurmët e autorëve të vrasjes së 64-vjeçarit, mbrëmjen e së enjtes në Pllanë të Lezhës.
Të paktën 3 persona dyshohet se kanë marrë pjesë në ekzekutim, 2 prej të cilëve kanë zbritur nga makina, kanë përshkruar rreth 20 metra rrugë në këmbë dhe kanë qëlluar në drejtim të Gjovalin Prendit.
Viktima në momentin që është ekzekutuar ka qenë në verandën e lokalit, duke shkruar në telefon, teksa në brendësi të bar kafes në pronësi të tij, ndodheshin 5 persona të tjerë, mes tyre dhe bashkëshortja e 64-vjeçarit.
Kjo e fundit, por dhe personat e tjerë dëshmitar në vendngjarje, në deklarimet e para kanë treguar se nuk kanë mundur të shquajnë autorët dhe se në momentin e breshërisë janë shtrirë në tokë.
Gjovalin Prendi, ishte babai i Sidorel Prendit (Roan Brahimit) i ekzekutuar në 9 Maj të 2024 në Athinë të Greqisë. I njohur ndryshe dhe me emrin Roan Brahimi, Sidorel Prendi ka qenë i dyshuar disa ngjarje të rënda kriminale.
Pikërisht këto ngjarje dhe e shkuara e djalit të 64-vjeçarit, janë pista me e fortë që hetusit janë përqëndruar për vrasjen e të enjtes në Pllanë.
