Gara politike për zgjedhjet e 11 Majit ka hyrë në fazën më të nxehtë të saj. Fushata ka nisur që prej 11 Prillit dhe partitë kanë dalë në betejë për të luftuar për 140 karriget e parlamentit shqiptar.
Gazetari Armand Shkullaku shikon të veçantë tek këto zgjedhje dy elementë. Së pari kreun e Partisë Demokratike, Sali Berisha që kërkon një rikthim për herë të dytë në moshën 81-vjeçare. Së dyti, kreun e Partisë Socialiste, Edi Rama që kërkon të mbajë mandatin si kryeministër, sipas Shkullakut, duke u dhënë njerëzve një iluzion.
“Kjo fushatë ka të veçantë ndryshe nga të tjerat dy elementë. Kemi një sfidë pothuajse të paimagjinueshme vetëm në histori mund ta kemi lexuar ose nëpër libra, një rikthim të dytë të Sali Berishës në moshën 81-vjeçare. Pra rikthimi i parë në 2005. Është një sfidë tepër e rrallë. Dhe në krahun tjetër kemi një njeri që ka 12 vjet në pushtet që po tenton të bindë njerëzit ta mbajnë prapë në pushtet duke u shitur një iluzion. Pra ne jemi në një fushatë “sui generis”, nuk ndodh në asnjë vend tjetër. Kemi një qeveri që do t’u shesë njerëzve një iluzion”, tha Shkullaku në një intervistë në Klan News.
Sipas tij, fushata e fundit që ka qenë e plotë ka qenë ajo e vitit 2005.
“Njerëzit ftoheshin të votonin për një ideal, për një kauzë, për një çështje të madhe. Me kalimin e kohës fushatat filluan të bënin llogari”, tha Shkullaku.
Duke pasur përvojën e zgjedhjeve të kaluara, Shkullaku theksoi se nuk përjashtohet mundësia që të ketë edhe incidente. I pyetur se kë sheh jashtë politikës pas zgjedhjeve të 11 Majit nëse humbet zgjedhjet, Shkullaku u përgjigj kështu:
“Për Berishën them se po se nëse humbet zgjedhjet e ka të sanksionuar në statut. Deri tani mirë ose keq, Berisha i është përmbajtur rregullave të reja në PD. Edhe për zgjedhjet lokale doli në votëbesim nga anëtarësia, kështu që mendoj se do ikë. Edi Rama nuk besoj se ikën nëse do humbasë zgjedhjet”, tha ai.
Sa i përket partive të reja theksoi se sheh të njëjtin problem që ka pasur shoqëria shqiptare post komuniste.
“Duan të fitojnë sot. Shqipëria nuk u mbush kot me kioska. Çdo njeri nuk mendon një biznes afatgjatë, pra që të mbjellësh sot dhe të korrësh nesër. I duan lekët sot, i duan votat sot, i duan vendet në parlament sot”, tha ai.
