Shtetet e Bashkuara të Amerikës i kanë bërë një ultimatum Rusisë që të arrijë negociatat përfundimtare me Ukrainën në fund të muajit prill. Agjencia Ndërkombëtare e lajmeve Reuters, bën me dije se ultimatumi për Rusinë është bërë i ditur nga i dërguari special i Donald Trump për konfliktin Rusi-Ukrainë, Stephen Witkoff.
Sipas një burimeve diplomatike për Reuters, nëse presidenti Vladimir Putin nuk bie dakord për një armëpushim deri në fund të muajit, Shtetet e Bashkuara janë të gatshme të vendosin sanksione të reja kundër Rusisë. Këto mund të jenë sanksione sipas urdhrit ekzekutiv të Trump ose sanksione sipas legjislacionit të miratuar nga Kongresi.
Nëse arrihet marrëveshja heqja e kufizimeve do të bëhet e mundur me një vendim të thjeshtë të presidentit; në rastin e dytë do të jetë e nevojshme një procedurë e gjatë, e cila në praktikë mund të zgjasë me dekada.
Ultimatumi për Kremlinin pritet të dorëzohet nga i dërguari special i Trump, Witkoff, i cili do të takohet me Putinin në Rusi. Gjatë dy muajve të fundit, diplomatët rusë dhe amerikanë kanë mbajtur të paktën gjashtë takime, përfshirë dy javën e kaluar, por asnjë prej tyre nuk ka dhënë ndonjë rezultat konkret. Më 2 dhe 3 prill, drejtori i Fondit të Investimeve Direkte Ruse, Kirill Dmitriev, vizitoi Uashingtonin dhe dje delegacionet e dy vendeve biseduan për gati 6 orë në Stamboll.
Sakaq, Ukraina do të marrë mbështetje të re ushtarake me vlerë 450 milionë paund. Këtë lajm e ka konfirmuar Kryeministri i Britanisë së Madhe ndërsa aleatët evropianë përpiqen të forcojnë pozicionin e vendit përpara çdo marrëveshjeje paqeje me Rusinë.
Britania do të sigurojë 350 milionë paund të shumës nga paketa e saj e mbështetjes ushtarake prej 4.5 miliardë paund për Ukrainën këtë vit, me Norvegjinë që do të kontribuojë me financim të mëtejshëm, tha ministria e Mbrojtjes e Britanisë.
