Mbyllja e pjesshme e qeverisë amerikane po sjell pasoja të drejtpërdrejta në transportin ajror. Vetëm gjatë ditës së sotme, janë anuluar rreth 700 fluturime në të gjithë Shtetet e Bashkuara më shumë se 3% e totalit të planifikuar — për shkak të mungesës së kontrollorëve të trafikut ajror që po punojnë pa pagesë prej mbi një muaji.
Sipas autoriteteve, ky është vetëm fillimi. Nga e hëna, numri i anulimeve pritet të dyfishohet, duke arritur në rreth 10% të fluturimeve ditore, në një periudhë që paraprin festën e Falënderimeve, një nga momentet më të ngarkuara të vitit për udhëtimet në SHBA.
Administrata Federale e Aviacionit (FAA) dhe Departamenti i Transportit njoftuan se masa ekstreme u mor për të ruajtur standardet minimale të sigurisë, pasi shumë kontrollorë janë detyruar të marrin leje mjekësore për shkak të lodhjes dhe stresit.
Fluturimet e anuluara prekin kryesisht linjat e brendshme mes qyteteve të vogla dhe qendrave të mëdha, ndërsa udhëtimet ndërkombëtare nuk janë ndikuar ndjeshëm.
Kompanitë më të prekura
American Airlines: 235 fluturime të anuluara
Delta Air Lines: 149
Southwest Airlines: 121
United Airlines: 112
JetBlue: 25
Frontier: 25
Sipas të dhënave të platformës Cirium, më 7 nëntor ishin planifikuar 25.375 fluturime, ndërsa rreth 748 prej tyre u anuluan. Për të shtunën, parashikohen 21.748 fluturime, me rreth 365 anulime të konfirmuara — shifër që pritet të rritet.
FAA ka paralajmëruar se reduktimi i fluturimeve do të vijojë në mënyrë graduale në 40 aeroportet kryesore të vendit:
4% më 7 nëntor
6% më 11 nëntor
8% më 13 nëntor
dhe 10% më 14 nëntor
Ndërkohë, linjat ajrore të huaja nuk preken nga masat dhe do të vijojnë operimet normalisht.
