4 shtylla të tensionit të Ulët në lagjen ‘Nato’ në Valias, ndodhen në oborret e banorëve prej dy vitesh. Banorët prej kohësh kërkojnë heqjen e tyre, por bashkia nuk ka ndërhyrë.
Banorët e lagjes “Nato” në Allias iu drejtuan Fiks Fare pasi prej dy vitesh nuk po gjenin dot zgjidhje. Shtyllat e tensionit të Ulët që prej dy vitesh ata i kishin në oborr të shtëpisë, që nga rikonstruksioni i rrugës. Edhe pse i janë drejtuar bashkisë për zhvendosjen e tyre, asgjë nuk është bërë.
Shtyllat sipas banorëve janë vënë në oborret e tyre sepse para shtrimit të rrugës aty ka qenë një kolektor që të gjitha papastërtitë që mblidhte ua shkarkonte në shtëpitë e tyre. Asokohe u kërkua atyre që shtyllat të spostoheshin në oborret e tyre që mos të rrinin mbi kolektor dhe me përfundimin e shtrimit të rrugës do të zhvendoseshin. Gjë e cila deri më sot nuk u bë.
Menjëherë Fiksi iu drejtua OSHEE-së dhe njësisë administrative, ku një inxhinier i OSHEE-së dhe administratori panë nga afër gjendjen e shtyllave në terren. Ata konstatuan problemin e banorëve dhe u kërkua që bashkia të vendoste vendin se ku do të viheshin shtyllat për të vazhduar puna për zhvendosjen e tyre.
Ata premtuan për Fiksin se problemi banorëve do të zgjidhej për një kohë të shkurtër dhe ashtu ndodhi.
Bashkia Kamëz bëri piketimin se ku do të viheshin shtyllat dhe OSHEE bëri zhvendosjen e tyre.
Banorët falenderuan emisionin Fiks Fare që problemi i tyre u zgjidh “Atë që s’e bënë institucionet për dy vjet e bëri Fiksi” thanë ata
