Prej tre vitesh, fermerëve që merren me kultivimin e midhjes në liqenin e Butrintit, në Sarandë, nuk u janë rinovuar kontratat e shfrytëzimit të impianteve të kultivimit.
Pas përfundimit të kontratave 10-vjeçare, kultivuesit thonë se kanë kërkuar prej kohësh rinovimin, por janë sorollatur mes institucioneve pa marrë zgjidhje. Sipas fermerëve, kjo sorollatje dhe padrejtësi po u bëhet për t’ua marrë aktivitetin e tyre jetik.
Nisur nga kjo situatë, një grupë fermerësh kanë vendosur të bëjnë grevë urie tek Ministria e Bujqësisë, ku nuk kanë munguar tensionet.
Në një denoncim të dërguar për JOQ, fermerët shprehen se dikush ka tentuar t’i nxjerrë me forcë nga godina. Ata kanë dërguar edhe një video ku shfaqet një person që u kërkon të largohen, ndërkohë që ata deklarojnë: “Nuk largohemi pa marrë zgjidhje”.
Fermerët akuzojnë qartë se po përjashtohen nga aktiviteti i tyre për t’i hapur rrugë oligarkëve dhe partneriteteve të dyshimta, që sipas tyre po gllabërojnë çdo mundësi pune në zonë, duke u marrë të vetmen të ardhur për të mbajtur familjet.
Kujtojmë se para disa javësh, fermerët e midhjeve protestuan edhe në mbledhjen e Këshillit Bashkiak të Sarandës, duke hedhur një arkë me midhje para këshilltarëve socialistë – një akt simbolik që, sërish, nuk mori asnjë reagim konkret.
Sot, situata ka arritur në pikën e shpërthimit. Grevë urie, tension, tentativa për nxjerrje me forcë – ndërsa institucionet… heshtin.
Liqeni i Butrintit ka rreth 80 impiante kultivimi të midhjes, nga të cilat rreth 50 janë funksionale. Ky sektor përbën një burim të rëndësishëm të ardhurash për zonën dhe luan rol kyç në furnizimin e tregut vendas me midhje.
