Gjykata e Lartë ka vendosur në dhomë këshillimi, mospranimin e rekursit të prokurorisë së apelit, që kërkonte ashpërsimin e veprës penale, nga vrasje me dashje, në vrasje me paramendim kryer në bashkëpunim, për të rinjtë që i morën jetën Marvi Mihalit më 31 korrik të 2017-ës në Tiranë pranë stadiumit Selman Stermasi.
Kështu është lënë në fuqi vendimi i Gjykatës së Apelit, që në qershor të vitit 2020 dënoi 4 të akuzuarit, për veprën penale të vrasjes me dashje kryer në bashkëpunim.
Konkretisht me 19 vite u dënua, Dejvi Bitrajn, personi që qëlloi me thikë për vdekje të riun Mihali, si dhe nga 12 vite burg u dha për Eugen Bitrajn si dhe për Marsel e Kridens Allën.
Prindërit e Marvit, Pavllo dhe Fatmira kanë kërkuar vazhdimisht që autorët e vrasjes së djalit të tyre, të dënohen për vrasje me paramendim kryer në bashkëpunim, për të cilën kodi penal parashikon një dënim më të lartë.
22-vjeçari, Marvi Mihali u vra në Korrik të 2017 në afërsi të stadiumit Selman Stërmasi në kryqytet.
Shkak, sipas hetimeve në atë koh%, u bë konflikti për një karikues telefoni, që fillimisht çoi në përplasje fizike mes të rinjve ku 4 të akuzuarit me në krye Dejvi Bitrajn e qëlluan atë me thikë të riun duke e lënë të vdekur në vend.
