Nga Basir Çollaku
Një konferencë me përfaqësi të Komisionit të Venecias për drejtësinë, zgjedhjet dhe çështje të shumta të ligjit në Tiranë, në kuadër të shumëvjetorit të bashkëpunimit më Këshillin e Europës, solli denoncimet e saj, ku realiteti nuk gënjen dot fantazinë. Komisioni në rekomandimet e tij kishte përmendur faktin e kontrollit të drejtësisë nga shumica parlamentare, nëse do të shkelej në këto rrugë siç ka ndodhur. Shenja të çregullimit i dha kryeministri, duke u larguar nga salla, kur fjalën e kishte kryetarja e Gjykatës Kushtetuese Holta Zaçaj, e cila nuk la pa kujtuar moszbatim nga mazhoranca të vendimeve të Gjykatës së drejtuar prej saj.
Teksti e konteksti shkonin dukshëm për vendimin për deputeten Olta Xhaçka, apo edhe Teatrin Kombëtar, e vendime jo të pakta të lëna në ajër, e shpërfillje. Ndonëse vërtetësisht guximi profesional i kësaj Gjykate, në shumë raste ka anuar nga pafuqia. Ndërkombëtarët e Venezias janë pyetur nga politika e drejtësia shqiptare edhe për llojin e vezëve në mëngjes, apo sa herë në ditë duhej ti thoshte Elisa shefit Skënderbej. Xhevahiret nuk kanë të sosur në garën servile ndaj kokëministrit.
Ajo çfarë zgjon edhe të qeshurat e Kopshtit Zoologjik, me aq kafshë viktima sa kanë tepruar, është ndoshta mes të tjerash një deklarim i kreut të Gjykatës së Lartë Sokol Sadushit. Ku ai shprehet se “Reforma në drejtësi shkëputi lidhjet politike që kishin paralizuar gjyqësorin, shkatërroi kulturën e pandëshkueshmërisë dhe vendosi integritetin në qendër të debatit.
Drejtësia shqiptare u perceptua si shpresë.” Nishanet e kiamtet ngjajnë me rrëfime të tilla. Individi gjykatës festues me shall pioneri, një nga simbolet e kohës së diktaturës, e çmon veten kontribues të reformës çliruese nga politika. E vërteta është se ai dhe kolegë partiakë të vënë nga Rilindja dhe tutori i saj fondacioni “Soros” nëpër ato zyra, e politizuan, saktësisht e dorëzuan drejtësinë në duart e një individi, Edi Ramës. Pa lënë në harresë regjinë për grabitje karrikesh të Gjykatës Kushtetuese, sipas porosisë së shefit të partisë dërguese. Mosndëshkueshmërinë e keni ndërruar me Zotin. Ka emrin e KM mosndëshkimi. Pa përmendur katrahurën vetting ku ai dhe disa nga shokët e rilindjes, rrëshkitën për shkaqe proceduriale të vetësajuar nga kasta.
Apo 140 mijë dosje stok, në pritje shqyrtimi pas 10 apo 20 vitesh, për një vendim. Pa surpriza cilësore se drejtësia brenda atij vendimi, varet gjithnjë e më tepër nga shëndeti financiar i portofolit të palëve dhe jo provat. Në shembullin e “kampionit soros-blinken antikorrupsion” Ardian Dvorani, me harresë të vogël 100 milionë lekë, për të provuar burimin e të ardhurave.
As nuk pipëtinë se një marrëveshje surrogate dosjet e Gjykatës së Lartë ia lanë nëpër duar një shoqate të financuar nga Soros, drejtuar nga delina Fico, me mbikqyrje të një turizmi ligjorë, duke shpartalluar e kontrolluar pritshmëritë. As nuk nxjerrin tingull se një kompani kanalizimish austriake ishte monitoruese e reformës, apo trupa mediokre u vunë në krye të sistemit, në shkeljë të dhunshme të kritereve kushtetuese.
E më pas u përfshinë në gjirin e partisë mëmë me mandate kuvendi apo drejtues administrate, ku ia lypte udhëheqja. Apo thjesht sepse u sajdisen 36 ekspertë të huaj, anonimë majtistë të partive motra, me nga 1000 euro dita, për të relaksuar ereksionet trupore e bankare. Kontrolloni lëndën sky-enchro reformatorë të drejtësisë, të gjithë, se mbase kanë mbetur pa u fshirë dialogjet tuaja nëpër tonelatat e dosjeve. Edhe nëse ka ndodhur kjo shkujdesje me porosi, këtu kopjet janë.
Origjinali është edhe në USA..Droga, trafiku, krimi organizuar, mafia shqiptare, të cilat janë pushteti real në vendin tonë, kanë njohur suksese globale, nga Brukseli, Londra, Amerika Latine, Dubai. Zotëria e quan çlirim, pasi e ka pushtuar partia e tij.
