Policia e Tiranës ka dalë me një komunikatë për mediat në lidhje me pamjet e publikuara mbrëmjen e djeshme në mediat, ku një grup efektivësh shoqëruan dhunshëm kryetarin e Ballit Kombëtar, Adriatik Alimadhi, i cili ndodhej në mabientet e lokalit të tij, dhe po i kërkonte llogari Policisë se pse po ushtronte kontroll në një ambient privat pa një vendim gjykate.
Blutë e kryeqytetit bëjnë me dije se Adriatik Alimadhin e kanë proceduar penalisht për veprën penale “Kundërshtim i punonjësit të rendit publik”.
Sipas Policisë, në lokalin e vëllait të Alimadhit është ushtruar kontroll, pasi dyshohej se ushtrohej veprimtaria e paligjshme e lojërave të fatit dhe basteve sportive.
“Ky shtetas dyshohet se, gjatë një kontrolli të ushtruar nga shërbimet e Policisë në një lokal në rrugën e “Dibrës”, me qëllim verifikimin e informacionit se në këtë ambient ushtrohej veprimtaria e paligjshme e lojërave të fatit dhe basteve sportive, ka refuzuar të zbatojë urdhrat e punonjësve të Policisë, duke i kundërshtuar verbalisht dhe fizikisht dhe ka tentuar të largohet nga ambienti, pavarësisht kërkesës për të qëndruar në vendin ku ndodhej, deri në përfundim të procedurës.” – njofton Policia.
Në lidhje me sjelljen e efektivëve, të cilët e shoqëruan dhunshëm Adriatik Alimadhin, autoriteten thonë se Agjencia e Mbikëqyrjes Policore ka nisur verifikimin e pamjeve.
“Në lidhje me këtë rast, Drejtoria Rajonale e Agjencisë së Mbikëqyrjes Policore Tiranë ka nisur veprimet verifikuese, bazuar në pamjet filmike të publikuara në rrjete sociale dhe pretendimet e paraqitura nga shtetasi në fjalë.” – thuhet në njoftim.
