Policia e Tiranës ka dalë me një komunikatë për mediat në lidhje me pallatin që u përfshi nga zjarri mesditën e kësaj të premteje në zonën e Astirit në Tiranë.
Autoritetet policore thonë se ka marrë flakë gabina e transformatorit në katin e parë të pallatit, teksa siç shihet edhe në videon e mëposhtme, tymi i zi dhe flakët kanë përfshirë më pas të gjithë pallatin.
Policia thotë se po evakuojnë banorët nga pallati, teksa mësohet se brenda kanë mbetur të bllokuar një i moshuar, një grua dhe një vajzë e vogël.
“Më datë 04.04.2025, rreth orës 14:10, në rrugën “Foto Xhavella”, në katin e parë të një pallati ka marrë flakë gabina e transformatorit. Shërbimet e Policisë ndodhen në vendngjarje dhe po bëjnë evakuimin e banorëve. Ndërkaq nga shërbimet zjarrëfikëset është bërë e mundur fikja e zjarrit. Nuk ka persona të lënduar. Grupi hetimor punon për përcaktimin e shkakut të zjarrit.” – njofton Policia.
