Deputeti demokrat Luan Baçi ka komentuar situatën politike në vend dhe pozicionimin e tij në listën e sigurt të kandidatëve për deputetë, ndërsa fushata elektorale do të nisë zyrtarisht pas një jave.
Baçi tha për News24 se nuk ka pasur asnjëherë pritshmëri të larta për pozicionimin e tij, duke e lënë gjithçka në dorën e punës dhe mbështetjes së demokratëve të Fierit.
“Nuk krijoj pritshmëri, çdo gjë ia lë punës, por nuk e vija në dyshim se do të isha në listën e mbyllur, pasi demokratët e Fierit më kanë votuar në mënyrë plebishitare sa herë kam qenë në garë. Në primaret e fundit isha ndër më të votuarit”- deklaroi ai.
Deputeti demokrat gjithashtu u shpreh se nuk do ta kishte parë si problem të ishte pjesë e një liste të hapur.
“Madje, do të më dukej më këndshëm të isha në listën e hapur, sepse do të garoje dhe të hyje në parlament me votë të hapu” – shtoi ai.
Baçi, teksa fliste për zonën ku kandidon, u shpreh se mungon mbështetja për fermerët nga qeveria.
Sipas deputetit, Frakulli bën luleshtrydhe shumë të shijshme dhe cilësore, por mungon uji për fermerët.
