Janë zbardhur detaje të reja nga rasti i regjistruar në Vlorë, ku një i mitur u vu nën hetim, pasi akuzohet se ka hakeruar faqet online të institucioneve shtetërore.
Mësohet se bëhet fjalë për një 15-vjeçar me spektrin e autizmit, i cioli sipas Policisë, dyshohet se gjatë muajit mars 2025 ka ndërhyrë në mënyrë të paautorizuar në të dhënat kompjuterike të disa institucioneve shtetërore (email-e dhe faqe zyrtare), duke shkaktuar ndërprerjen e funksionimit të tyre për periudha të caktuara kohore.
Burime bëjnë me dije se pre e sulmit haker kanë rënë 6 institucione në qytetin e Vlorës, teksa i mituri ka tentuar që të hakerojë edhe faqen e Kuvendit dhe të SHISH, por nuk ia ka dalë dot.
Nga hetimet e deritanishme ka rezultuar se i mituri ka vepruar i vetëm, ndërsa në dëshminë e dhënë për grupin hetimor ka deklaruar se sulmin e ka bërë për kuriozitet.
Autoritetet raportuan se kanë sekuestruar disa pajisje, të cilat do t’i nënshtrohen ekzaminimeve të thelluara teknike, konkretisht: 5 kompjuterë laptop, 6 aparate celularë dhe 1 dron.
“Nga hetimet e deritanishme nuk ka rezultuar vjedhje të të dhënave apo dokumenteve konfidenciale nga këto sisteme.” – njoftoi Policia për operacionin “The Accountant”.
