Qyteti i Vlorës do të përballet sërish me ndërprerje të furnizimit me ujë të pijshëm ditën e martë, më 24 shkurt, për shkak të punimeve të planifikuara në rrjet.
Ujësjellës Kanalizime Rajoni Vlorë ka njoftuar se do të kryhet stakim i detyruar i stacionit kryesor, në kuadër të projektit të ri të ujësjellësit, për lidhjen e nyjeve të rrjetit të ri me atë ekzistues.
Si pasojë, do të ndërpritet furnizimi me ujë në zonat: Uji i Ftohtë, Lungomare, “10 Korriku”, Kalaja dhe Jonufra. Ndërkohë, pjesa tjetër e qytetit nuk do të ketë ujë gjatë orëve të pasdites, ndërsa në mëngjes shpërndarja pritet të vijojë normalisht.
Furnizimi me ujë do të rikthehet në normalitet mëngjesin e së mërkurës.
Ndërkohë, kujtojmë se gjatë festave të fundvitit Vlora mbeti për disa ditë pa ujë për shkak të një problemi në sistemin e ujësjellësit, çka shkaktoi pakënaqësi te qytetarët dhe bizneset në zonën bregdetare.
