Mbledhja e radhës e Këshillit Bashkiak të Elbasanit ka përfunduar në mënyrë të papritur për shkak të bojkotit nga ana e këshilltarëve të opozitës.
Ata braktisën mbledhjen, duke çuar në dështimin e saj për shkak të mungesës së kuorumit, pasi një nga çështjet më të rëndësishme që kishte të bënte me zgjatjen e kontratës për inceneratorin e qytetit, nuk ishte përfshirë në rendin e ditës.
Pavarësisht kundërshtimeve të bëra nga opozita një muaj më parë për miratimin e kontratës për shërbimin publik të trajtimit dhe depozitimit të mbetjeve, ku kërkuan një informacion të detajuar dhe një monitorim të kujdesshëm të kontratës gjatë dy viteve të fundit, kjo çështje nuk u mor parasysh në mbledhjen e sotme.
Sipas këshilltarëve të opozitës, kjo është një papërgjegjshmëri e autoriteteve lokale dhe një tentativë për të fshehur një situatë mjedisore serioze për shkak të afërsisë me periudhën e fushatës elektorale. Ata theksuan se në disa bashki të qarkut të Elbasanit, aktualisht nuk ka një vend për të depozituar mbetjet, duke krijuar një emergjencë mjedisore që kërkon vëmendje të menjëhershme.
Nga ana tjetër, Prokuroria e Elbasanit ka nisur hetime të thelluara ndaj kompanisë Eco Elb, që menaxhon inceneratorin e Elbasanit, për akuzat e “Shkatërrimit të Pronës me zjarr” dhe “Ndotje të ajrit”. Hetimi ka lidhje me një zjarr të madh që përfshiu landfillin e mbetjeve në korrik të vitit 2023.
Autoritetet ligjzbatuese kanë sekuestruar dokumente dhe morën në pyetje disa persona, përfshirë administratorin e kompanisë, Leli Kaja, duke zgjeruar hetimin për shpërdorim të detyrës nga ana e menaxhimit të impiantit.
Situata ka krijuar një atmosferë të tensionuar, ku opozita dhe qytetarët e Elbasanit po kërkojnë një zgjidhje urgjente për problemet mjedisore, ndërsa autoritetet përballen me presionin e hetimeve dhe mungesës së një planifikimi të qartë për menaxhimin e mbetjeve.
