Gjykatësja që dënoi lideren e ekstremit të djathtë, Marine Le Pen, duke i ndaluar asaj kandidimin në zgjedhjet presidenciale të Francës në vitin 2027, është vënë nën mbrojtjen e policisë pasi është përballur me kërcënime me vdekje.
Po ashtu, adresa e saj e shtëpisë është shpërndarë në internet.
Benedikte de Perthuis, (Benedike De Pertu) kryetarja e një paneli prej tre gjyqtarësh që shpalli Le Penin fajtore për përvetësim të fondeve të BE-së, tani është duke u mbrojtur nga policia, në punë dhe në shtëpi.
De Perthuis gjithashtu ka marrë kërcënime në mediat sociale, pasi fotoja e saj është përhapur me të madhe në rrjetin social X dhe faqet e ekstremit të djathtë.
Policia e Parisit ka konfirmuar se një hetim është duke u zhvilluar lidhur me kërcënimet ndaj De Perthuis.
Le Pen u shpall fajtore të hënën për përvetësim të fondeve të BE-së për ta financuar partinë e saj.
Ajo përveç që është ndaluar nga kandidimi për poste publike për 5 vjetët e ardhshme, është dënuar edhe me katër vjet burgim, dy prej të cilave me kusht dhe dy të tjera mund t’i kryejë në liri duke mbajtur hallkë elektronike, dhe po ashtu me gjobë në vlerë prej 100.000 euro.
Presidenti francez, Emmanuel Macron, ka dënuar të mërkurën kërcënimet me vdekje në drejtim të gjyqtares, Benedikte de Perthuis, duke i cilësuar si absolutisht të papranueshme dhe të patolerueshme.
Macron gjithashtu ka komentuar për herë të parë vendimin e gjykatës për ta dënuar Le Penin, duke theksuar se “dega gjyqësore është e pavarur” dhe se “ligji është i barabartë për të gjithë”.
