Nga Boldnews.al
Me një proces gjyqësor mbi supe për pastrim parash në Kosovë, si edhe me dyshime publike për përfshirje në koncesionet problematike të Shëndetësisë në Shqipëri, biznesmeni Klodjan Allajbeu duket se nuk është ndjerë aspak komod kur bashkëpunëtori i tij i ngushtë, Asllan Fetiu, njëkohësisht administrator i rrjetit të dyqaneve “Anamark”, plagosi një 85-vjeçar, pak ditë më parë në Berat.
Një ditë pasi Fetiu kreu aktin e rëndë kriminal, shefi i tij, Allajbeu, ka pranuar “dorëheqjen e administratorit”, një lëvizje që duket se ka pasur qëllim që të mbrojë sa më shumë biznesmenin e rëndësishëm në fushën spitalore.
“Dorëheqja” rezulton se është dorëzuar në kompani nga arratia, pasi Asllan Fetiu nuk u arrit të arrestohej nga Policia pas krimit, duke u larguar “në drejtim të paditur”
Sipas kronikës policore, pasditen e 24 Marsit, 37-vjeçari Asllan Fetiu, hyri në një lokal në lagjen Çelepias të Berat, ku kërkonte një person, me të cilin dyshohet se kishte pasur konflikt më herët.
Ai nuk e gjeti “objektivin”, por kishte nisur të ofendonte klientët e tjerë që gjendeshin në lokal. Për arsye, ende të pasqaruara plotësisht nga Policia, Asllan Fetiu konfliktohet me të moshuarin Todi Biçaku, duke e plagosur me thikë në bark.
Një ditë më pas, e konkretisht në 25 Mars 2025, pronari i rrjeteve të dyqaneve “Anamark”, Klodjan Allajbeu, miraton vendimin, në bazë të të cilit pranon dorëheqjen e Asllan Fetiut nga pozicioni i administratorit të kompanisë, sipas një dokumenti të siguruar nga “Boldnews.al”.
Është e paqartë se si Asllan Fetiu ka dorëzuar tekstin e dorëheqjes, pasi ai ishte në kërkim nga Policia dhe, si rregull, duhet t’i ketë pasur lëvizjet dhe veprimet shumë të kufizuara.
Fetiu, njeriu “kyç” i Allajbeut
Asllan Fetiu rezulton si administrator i disa prej bizneseve me pronar Klodian Allajbeun. Sipas një raportimi të mëparshëm të “Boldnews.al”, 37-vjeçari Fetiu është administrator në kompanitë “Anamark”, “EKMA ose Tregu Agro-Ushqimor në Tiranë. Ndërkohë, “Anamark”, zotëron 85% të kapitalit tek një tjetër biznes i Allajbeut, “Equos Resort” në Mullet.
Po ashtu, Asllan Fetiu rezulton si administrator edhe tek kompania “Medical Recycling”, me pronar 100 % Klodian Allajbeun. Kjo kompani ka si veprimtari “në fushën e trajtimit, riciklimit dhe përpunimit të mbetjeve spitalore, hapja dhe menaxhimi i qëndrave të përpunimit të mbetjeve spitalore. Import-Export, tregti me shumicë dhe pakice i makinerive për trajtimin e mbetjeve.”
Asllan Fetiu ka qenë dhe pronar i kompanisë “Forever Construction”. Kjo kompani ka si veprimtari “Investime në fushën e ndërtimit, ndërtime të objekteve qytetare, industriale dhe qëndra multifunksionale, punime dheu, sistemime, ndërtime pallatesh civile, ekonomike, tregtare, kulturore, sportive, të objekteve sociale, hoteleve, fshatrave turistike, etj.”.
Ndërkohë, në Prill të vitit 2020, këtë kompani Asllan Fetiu e ka shitur tek Kloldian Allajbeu, i cili më vonë sërish e ka shitur tek persona të tjerë, por kalimi nga Fetiu tek Allajbeu, nisur nga faktet e mësipërme, duket se kemi të bëjmë me një shitje fiktive.
Ndërkohë, pavarësisht se rezulton si administrator i bizneseve të Klodian Allajbet, mediat raportojnë se 37-vjeçari punonte si shofer i biznesmenit.
Kujtojmë se Klodian Allajbeu është një prej biznesmenëve më të akuzuar në Shqipëri, teksa pak kohë më parë u paraqit për t’u marrë në pyetje edhe në Prokurorinë e Posaçme (SPAK), ku ka dëshmuar për rreth dy orë.
Allajbeu është përfolur si i përfshirë në dy nga dosjet e nxehta të shëndetësisë: atë të koncesionit të laboratorëve dhe dializës. Emri i tij u shfaq edhe në dosjen e Erion Veliajt, ku kanë udhëtuar së bashku në drejtim të Kinës, ku prokurorët nuk kanë marrë edhe përgjigje se kush i ka mbuluar shpenzimet për këtë udhëtim.
Plagosja me thikë në Berat/ Autori është administratori i bizneseve të Klod Allajbeut
