Agjencia Amerikane për Media Globale (USAGM) ka tërhequr vendimin e saj për t’i dhënë fund financimit të Radios Evropa e Lirë/Radio Liberty (RFE/RL) për vitin 2025, duke mbajtur në fuqi marrëveshjen e grantit të transmetuesit, tha RFE/RL.
Presidenti i Radios Evropa e Lirë, Stephen Capus, e quajti lëvizjen një “shenjë inkurajuese” se operacionet mund të vazhdojnë, megjithëse transmetuesi ende është në rrezik.
Transmetuesi me bazë në Pragë kishte ngritur një padi kundër agjencisë së tij mëmë në një gjykatë federale të Uashingtonit, duke argumentuar se shkurtimi i financimit i urdhëruar nga presidenti Donald Trump ishte i paligjshëm sepse Kongresi i kishte ndarë tashmë fondet.
Trump kishte urdhëruar shkurtime masive të USAGM, e cila mbikëqyr të gjitha programet e huaja transmetuese të financuara nga shteti në Shtetet e Bashkuara që nuk drejtohen nga ushtria.
Një gjykatës i gjykatës federale lëshoi një urdhër të përkohshëm ndalimi kundër USAGM-së lidhur me ndërprerjen e financimit të Radios Evropa e Lirë.
Mosmarrëveshja përfshin një grant të papaguar prej 77 milionë dollarësh që ishte menduar të zgjaste deri në fund të vitit.
Është e paqartë nëse Radio Evropa e Lirë tani do ta heqë padinë e saj apo do të shtyjë përpara për të siguruar një vendim përfundimtar.
E themeluar në vitin 1949 gjatë Luftës së Ftohtë, RFE/RL ofron lajme të pavarura në 23 vende, duke përfshirë Rusinë, Ukrainën dhe Iranin. Rusia e caktoi transmetuesin një “organizatë të padëshiruar” më shumë se një vit më parë, duke e detyruar atë të zvogëlojë operacionet atje.
Ministri i Jashtëm çek Jan Lipavský mbrojti Radio Evropa e Lirë, duke e quajtur atë një nga burimet e pakta të lajmeve të pavarura për njerëzit që jetojnë nën shtypje nga Bjellorusia në Iran dhe nga Rusia në Afganistan.
