Prokurorët francezë kërkuan të enjten një dënim me shtatë vjet burg dhe një gjobë prej 300,000 eurosh për ish-presidentin francez Nicolas Sarkozy, me dyshimin se kishte marrë miliona euro nga ish-diktatori libian Muammar Gaddafi për ta ndihmuar atë në fushatën e tij zgjedhore të vitit 2007.
Sarkozy është në gjyq që nga janari me dyshimin për “mbulim të përvetësimit të fondeve publike, korrupsion pasiv, financim të paligjshëm të fushatës”.
Prokurori financiar, Sebastien de La Touanne, i ka përshkruar akuzat kundër Sarkozy dhe 12 të dyshuarve të tjerë si “korrupsion me intensitet të lartë”.
De La Touanne tha se Sarkozy kishte kryer “një pakt korrupsioni me një nga diktatorët më të padëshiruar të 30 viteve të fundit”.
Prokurorët kanë kërkuar gjithashtu ndalimin e funksioneve publike për pesë vjet dhe përdorimin e disa privilegjeve.
Jashtë gjykatës, avokatët e Sarkozy kanë deklaruar se dënimet e kërkuara ishin shumë të ashpra dhe të pabaza.
“Ai është i pafajshëm”, tha avokati Christophe Ingrain.
Sarkozy përmes rrjetit social Facebook ka deklaruar se rasti është i motivuar politikisht dhe se do të luftojë për të vërtetën dhe se beson në urtësinë e gjykatës.
Prokurorët kanë kërkuar nga një deri në gjashtë vjet burg dhe gjoba deri në 150,000 euro për ish-krahun e djathtë të Sarkozy-t, Claude Gueant, ish-ministrin Brice Hortefeux dhe ish-shefin e financave të fushatës së Sarkozy-t, Eric Woerth.
