“Vendimi për të mos qenë pjesë e listës së hapur të PD-së për Tiranën nuk ishte një vendim i lehtë, por ishte i duhuri për të lënë vetes kohën e nevojshme për të reflektuar mbi angazhimin e mëtejshëm politik.”
Kjo ishte një prej fjalive që fituesi i Primareve të PD-së në Tiranë, Hysen Kadiu shkroi në reagimin e tij, kur vendosi të tërhiqej nga kandidimi për deputet, pasi u la në listën e hapur, teksa nuk i kurseu kritikat për lidershipin e partisë në qendër.
Disa e morën atë fjali, se Hysen Kadiu, ish kreu i degës së PD-së në Kavajë do t’i jepte lamtumirën angazhimit në politikë, por ditën e sotme fituesi i Primareve në Tiranë është shfaqur sërish në krah të Berishës.
Kreu i Bashkisë së Kavajës, Fisnik Qosja ka shtruar mbrëmjen e sotme një iftar për besimtarët myslimanë për Natën e Kadrit, ku i pranishëm ka qenë edhe Sali Berisha. Siç shihet në fotot e mëposhtme, pranë Berishës në tavolinë shfaqet dhe Hysen Kadiu.
Kujtojmë se Hysen Kadiu, ditën e zyrtarizimit të listave të kandidatëve për deputet, hodhi akuza drejt drejtuesve të PD-së se Kavaja, sipas tij, nuk mund të konsiderohet vazhdimisht si hambari i votave për PD, ndërsa përfaqësimi i saj në listat e deputetëve të jetë i padenjë.
Ai shtonte më tej se PD nuk mund të shndërrohej në një parti që bën qoka për të preferuarit e qendrës dhe të lihen jashtë prioriteteve qëndrestarët e vërtetë.
