Në monitorimin e institucioneve shëndetësore, të cilat tenderojnë edhe vlerat më të larta të prokurimeve, rezulton se një nga institucionet që tenderon vlera shumë të larta dhe në mungesë totale konkurence është Qendra Kombëtare e Transfuzionit të Gjakut.
Së fundmi, Qendra Kombëtare e Transfuzionit të Gjakut ka shpallur fituesin e tenderit me objekt “Blerje kite, reagentë dhe aksesorë të tjerë të nevojshëm për testime në laboratorin e agjentëve infektivë”, me fond limit 1 miliardë e 76 milionë lekë dhe vlerë kontrate 1 miliardë e 61 milionë lekë, sa 99% e vlerës së fondit limit. Në garë kanë marë pjesë dy operatorë, një me ofertë 0 lekë dhe firma fituese shoqëria “PEGASUS” shpk . Pra ky tender është dhënë pa garë.
Xhadat analizuan të gjithë tenderat e fituar nga shoqëria PEGASUS shpk në Qendrën Kombëtare të Transfuzionit të Gjakut ku rezulton se për periudhën 2014 – 2025 kjo shoqëri ka përfituar vetëm nga ky intitucion 26 procedura prokurimi, me vlerë 15.6 miliardë lekë, nga të cilat 77% të procedurave në total i ka përfituar si operator i vetëm në garë. Ka pasur edhe nga ato raste ku kanë marrë pjesë shoqëri të tjera por pa ofertë ekonomike. Vlera e tenderave të fituar nga kjo kompani pa garë në këtë institucion është 11.6 miliardë lekë ose 75% e vlerës total të prokuruar.
Nga ana tjetër, nga të dhënat e Open Data Albania rezulton se kjo shoqëri ka përfituar 90 procedura prokurimi nga institucionet shëndetësore .
29% e këtyre procedurave janë fituar nga Qendra Kombëtare e Transfuzionit të Gjakut, që me pas ndiqet nga QSUT, Spitali Universitar Shefqet Ndroqi, Ministria e Shëndetësisë . Edhe në tenderat e zhvilluar nga institucionet e tjera sipas Open Data Albania 63.2% janë tendera me një operator në garë, pra pa garë.
Pavarësisht se Qendra Kombëtare e Transfuzionit të Gjakut si institucion ndëron drejtues dhe objektet e tenderave që prokurohen kane me dhjetra operatorë që ofrojnë të njëjtin shërbim, sërisht fiton e njëjta kompani. Në vitin 2017 personi që ka firmosur kontratën është Ilir Beqaj, në cilësinë e Ministrit të Shëndetësisë dhe tenderi sigurisht është pa garë, në vitin 2019 në cilësinë e drejtueses ka firmosur Valbona (Docaj) Tahiraj, në vitin 2020 – 2023 drejtues është Kristo Raca, nga viti 2023 e vijim drejtuese është Irena Seferi, dhe pavarësisht ndërimit të drejtuesve, kjo shoqëri vijon të përfitojë pa garë procedura prokurimi, ku nga 15.6 miliardë lekë tendera vetëm nga ky institucion, ka përfitur pa garë plot 11.6 miliardë lekë.
Nxitja e konkurueshmërisë është nga parimet bazë të ligjit të prokurimit publik, i cili duket se në këtë rast shkelet me të dyja këmbët dhe në mënyrë të përsëritur ndër vite.
Shoqëria Pegasus shpk eshte ne administrimin e shtetasit grek Janis Karathano.
Lidhjet e forta të Janis Karathano, zotëruesit të kësaj shoqërie, faktohen edhe në përfitimin e koncesionit të laboratorëve nga Ministria e Shendetesise, si një nga katër koncesionet e dyshuara si korruptive të cilat po hetohen aktualisht në SPAK. Mbi bazën e materialit hetimor të dërguar nga Kontrolli i Lartë i Shtetit është regjistruar procedimi penal nr.18, datë 31.01.2022 për veprat penale shkelja e barazisë së pjesmarrësve në tendera dhe ankande publike, shpërdorim detyre dhe korrupsion pasiv i personave që ushtrojnë funksione publike. Në lidhje me këtë procedim penal në muajin shkurt 2025 u thirr në SPAK edhe ish- ministrja e shëndetësisë Ogerta Manastirliu.
/Emisioni “Xhadat”
