Në një postim në rrjetet sociale, Conor McGregor njoftoi se dëshiron të kandidojë për t’u bërë president të Irlandës në zgjedhjet e ardhshme, që priten më 11 nëntor 2025. Luftëtari MMA theksoi se dëshiron të kundërshtojë paktin e ri të Bashkimit Evropian për migracionin dhe azilin.
“Kush tjetër do t’i kundërvihet qeverisë dhe këtij ligji. Unë do ta bëj”, tha ish-kampioni i dyfishtë i botës. Ai e bëri këtë deklaratë gjatë një vizite në Shtëpinë e Bardhë, ku dhe u takua me presidentin e Amerikës, Donald Trump.
“Ndërsa unë e kundërshtoj fuqimisht këtë marrëveshje, nuk është për mua apo ndonjë qeveri të zgjedhë të vendosë”, shkroi McGregor, duke parashikuar një referendum të mundshëm. “Është një zgjedhje e njerëzve. Kjo është demokracia dhe është e ardhmja e vendit me mua si president”, deklaroi irlandezi.
Ligjërisht, McGregor ka të drejtë të kandidojë: Ai është 36 vjeç (mosha minimale është 35) dhe për të kandiduar ai ka nevojë për mbështetjen e të paktën 20 anëtarëve të Parlamentit irlandez (Oireachtas) ose katër këshillave lokale.
McGregor ishte i ftuar i presidentit amerikan Donald Trump me rastin e festës së Shën Patrikut, e cila u festua më 17 mars. Luftëtari irlandez ndoqi kështu gjurmët e Dana White, presidenti i UFC, i cila gjatë fushatës së fundit zgjedhore në SHBA kishte mbajtur hapur anën e Donald Trump.
Problemet larg kafazit mund të pengojnë kandidaturën e tij: Në nëntor 2024, McGregor u dënua në një gjykatë civile për t’i paguar 248 mijë euro dëmshpërblim një gruaje që e kishte akuzuar për përdhunim. Viktima kishte ngritur padinë civile pasi prokurori kishte vendosur të mos e ndiqte atletin në një nivel penal, duke pasur parasysh mungesën e “perspektivave të arsyeshme të fajit”.
Conor McGregor është deklaruar gjithmonë i pafajshëm, duke folur për një marrëdhënie konsensuale, ndërsa gruaja e kishte akuzuar se e kishte rrahur brutalisht dhe e kishte detyruar të kryente marrëdhënie.
